މާލޭ ސިޓީ ކައުންސިލުން ބުނީ މާފަންނު ސަހަރާ ހުސްކުރުމުގެ މަސައްކަތް ހަވާލުކޮށްފައިވަނީ ލޭންޑް ސްކޭޕިން ސޮލިއުޝަން ކިޔާ އަމިއްލަ ކުންފުންނަކާއި ހަވާލުކޮށްގެން ކުރަމުން އަންނަކަމަށެވެ އަދި އަމަލީ މަސައްކަތް މިދިޔަ ހަފްތާގައި ފަށާފައިވާކަމަށް މަސައްކަތް ހަވާލުކުރީ 2 މަސްދުވަހުގެ ތެރޭގައި ނިންމާ ގޮތަށްކަމަށް ސިޓީ ކައުންސިލުން ބުނެއެވެ.
ކައުންސިލުން ބުނީ ސަހަރާ ހުސްކޮށް ސާފުކުރުމުގައި އެތަނުން ނަގާ މިނިކަަށިތައް ގެންދާނެ ތަނެއް ކަނޑައަޅާނީ އިސްލާމިކް މިނިސްޓްރީންނެވެ.
ސިޓީ ކައުންސިލުން ބުނީ ޕާކިން ހެދުމަށް މާފަންނު ސަހަރާގެ 36،153 އަކަފޫޓްގެ ސަރަހައްދެއް ހުސްކުރުމަށް ނިންމާފައިާކަމަށެވެ.
މާލޭގެ ޕާކިން މައްސަލަ ހައްލުކުރުމަށް ޕާކިން އޭރިޔާ ހެދުމަށް މައްޗަންގޮޅި ސަހަރާގެ ކަންމަތިން އެއްބަޔާއި، ގަލޮޅު، މާފަންނު އަދި ހެންވޭރު ސަހަރާގެ ބައެއް ނަގާ އެ މަސައްކަތް ކުރާނެކަމަށް މާލޭ ސިޓީ މޭޔަރު އާޒިމް ވަނީ ކުރިން ވިދާޅުވެފައެވެ.
މާފަންނު ސަހަރާގެ އެއްބައި ނަގާ މިހާރުވެސް އޮތީ ޕާކިންނަށް ހާއްސަކޮށްފައެވެ. މިކަން މިދިޔަ ސަރުކާރާއި ރައީސް ޔާމީން ސަރުކާރުގައިވެސް ކުރަން އުޅުމުން ބައެއް މީހުންގެ ފާޑުކިޔުންތައް އޭރު އަމާޒުވިއެވެ.
