މިނިސްޓްރީން ބުނެފައިވަނީ، މި ގާނޫނުގެ ބިލް މިހާރު ވަނީ ޑްރާފްޓްކޮށް ނިމި، ބަންޑާރަނައިބުގެ އޮފީހަށް ފޮނުވާފަކަމަށެވެ. މީގެ ކުރިން މިފަދަ ގާނޫނެއް ނެތުމުން، މި މަސައްކަތް ނިންމާލެވުނުކަމީ ވަރަށް ބޮޑު ހިތްހަމަޖެހުމެއް ކަމަށްވެސް އެ މިނިސްޓްރީން ބުނެއެވެ.
މި އާ ގާނޫނުގެ ސަބަބުން ޕެޓްގެ ގޮތުގައި ގެންގުޅޭ ޖަނަވާރުތައް ރަޖިސްޓަރީކޮށް، ޓެގުކުރެވޭނެއެވެ. މީގެ ސަބަބުން މަގުމަތީގައި އުޅޭ ޖަނަވާރުތަކުގެ ވެރިފަރާތް ހޯދުމަށް ފަސޭހަވެ، އަދި އެ ޖަނަވާރުތަކުގެ ސިއްހަތާ ގުޅޭ ކަންކަން ހަރުދަނާ ނިޒާމެއްގެ ދަށުން ބެލެހެއްޓުމަށް މަގުފަހިވެގެންދާނެ ކަމަށް މިނިސްޓްރީން ބުނެއެވެ.
މާލެ ސަރަހައްދުގައި އުޅޭ ބުޅާ ހިމާޔަތްކުރުމަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީ އާއި މާލޭ ސިޓީ ކައުންސިލް ގުޅިގެން ހުޅުމާލޭގެ ފަރުކޮޅުފުށި ސަރަހައްދުގައި ޕެޓް ކެއާ ފެސިލިޓީއެއް ވަނީ ގާއިމްކޮށްފައެވެ.
