މިފްކޯގެ ހެޑް އޮފީހުގައި މިއަދު ކުރިއަށް ދިޔަ މި ބައްދަލުވުމުގައި ވަނީ އެ ކުންފުނީގެ ސައިޓްތަކުގައި ހުރި ދަނޑުބިންތައް ދިރާސާކޮށް، އެ މަސައްކަތް ފުޅާ ކުރުމަށް މަޝްވަރާކޮށް، އެ މަސައްކަތް ކުރާނެ ގޮތުގެ ޕްލޭނެއް އެކުލަވާލުމަށް ނިންމާފައިކަމަށް މިފްކޯއިން ބުނެ އެވެ.
މިފްކޯގެ ސައިޓްތައް ކަމަށްވާ ފެލިވަރާއި ކޫއްޑޫގައި ގެންގުޅޭ ބަކަރި އަދި ކުކުޅު ފަދަ ޖަނަވާރުތައް އިތުރު ކުރާނެ ގޮތްތަކާއިމެދުވެސް ވަނީ މުހިންމު މަޝްވަރާތަކެއް ކޮށްފައިކަމަށް މިފްކޯއިން ބުނެއެވެ. މީގެ އިތުރުން ފުނައްޑޫގައި ދަނޑުވެރިކަން ފުޅާކުރުމުގެ އަމަލީ މަސައްކަތް ގެންދާނެގޮތާއި މެދުވެސް މަޝްވަރާ ކުރެވުނުކަމަށް ފާހަގަކޮށް މިފްކޯއިން ބުނީ ހާއްސަގޮތެއްގައި މިފްކޯގެ މުވައްޒަފުންނަށް އަމާޒުކޮށް ދަނޑުވެރިކަމުގެ ފަންނީ ތަމްރީންތައް ކުރިއަށް ގެންދިއުމަށް ފުޅާ ދާއިރާއެއްގައި މަޝްވަރާ ކުރެވިފައިވާކަމަށެވެ.
މިފްކޯއިން އެގްރިކަލްޗާ މިނިސްޓްރީއާއެކު ކުރިއަށް ގެންދިޔަ ބައްދަލުވުން
މި މަޝްވަރާ ބައްދަލުވުމުގައި އެގްރިކަލްޗާ މިނިސްޓްރީގެ އިސް ބޭފުޅުން ވަނީ ދަނޑުވެރިކަމުގެ ދާއިރާއިން މިފްކޯއަށް ދޭންވާ ހުރިހާ އެއްބާރުލުމާއި އެހީތެރިކަން ފޯރުކޮށްދިނުމުގެ ޔަގީންކަން ދެއްވާފަ އެވެ. އޭގެ ތެރޭގައި މިފްކޯގެ ސައިޓްތަކުގެ ދަނޑުބިންތަކާއި، ގަސްހަގާއި ގެއްސާއި، ގެންގުޅޭ ޖަނަވާރުތަކަށް ދިމާވާ މައްސަލަތަކާއި ޖެހޭ ބަލިތައް ދެނެގަނެ، ހައްލު ހޯދުން ހިމެނެއެވެ. މީގެ އިތުރުން އެކަންކަން ހަރުދަނާކޮށް، ފުޅާކުރުމުގައި މިނިސްޓްރީގެ ފަންނީ އެހީތެރިކަން ފޯރުކޮށްދިނުމާއި ގުޅޭގޮތުންވެސް ވަނީ ގިނަ މަޝްވަރާތަކެއް ކުރެވިފައިކަަމަށް އެކުންފުނިން މައުލޫމާތުދެއެވެ.
"ސީއެންއެމް" އަށް މައުލޫމާތުދެމުން މިފްކޯގެ މީޑިއާ އޮފިޝަލު އިބްރާހިމް ސައީދު(ކޭޑު) ވަނީ މިފްކޯއިން ދަނޑުވެރިކަމަށް އިސްކަންދޭން ޖެހުނު ގޮތުގެ ވާހަކަ ހިއްސާކުރައްވާ މިފްކޯއިން ދަނޑުވެރިކަން ފުޅާކުރަން ނިންމާފައިވާގޮތުގެ ވާހަކަ މައްޗަށް އަލިއަޅުއްވާލާފަ އެވެ.
މިފްކޯއިން އަބަދުވެސް ދައްކަމުން އަންން ވާހަަކައަކީ ހަރަދުތައް މެނޭޖް ނުކުރެވުމުގެ ވާހަކަ ކަމަށާއި އާންމުކޮށްމަސްވެރިކަން ދަށް ދުވަސްވަރުގައި ބާނާ މަސް ނުކިރާފިއްޔާމުން ވިޔަފާރިއެއްކޮށް ބަގުރޫޓު ވެ ހިނގައިދިއުން އެއީ ދުރުގައި އޮތްކަމެއް ނޫންކަމަށް ކޭޑް ވިދާޅުވި އެވެ.
އަބަދުވެސް މިފްކޯއިން ދަނޑުވެރިކަން ކޮންމެވެސް ވަރަކަށް ކުރާކަމަށް ފާހަގަކޮށް ކޭޑް ވިދާޅުވީ ހަގީގަތުގައި ދެމެހެއްޓެނިވި ގޮތަކަށް ދަނޑުވެރިކަން ނުކުރެވޭކަމަށެވެ.
މިފްކޯއިންއަށް ވިސްނުނީ މިހާރު އޮތް އެގްރިކަލްޗާ ސްޓައިލް ބަދަލުކޮށް، ކަމުގެ މާހިރުން ގެނެސް އެމީހުންނާ ވާހަކަ ދައްކައިގެން، އެމީހުންގެ މައުލޫމާތު ބިނާކޮށް، ދަނޑުވެރިކަން އިތުރަށް ފުޅާކޮށްފިކަމަށް ވާނަމަ މިހާރު މިފްކޯއަށް ބޭނުންވާ ސަޕްލައިއަށް ކުރާ ހޭދަ ކުޑަ ކުރެވޭނެ ކަމަށްކަން ކޭޑް މައުލޫމާތުދިނެވެ.
ގަަންނަން ޖެހޭ ބައިގެ ބަދަލުގައި މުވައްޒަފުންނާ ހިއުމަން ރިޒޯސަސްއަށް ވަސީލަތާ ތަމްރީން ބޭނުންކޮށްގެން ތަރުކާރީގެ އެކި ބާވަތަތައް އުފެއްދޭނަކަމަށާއި މިފްކޯއަށް ބޭނުންކުރާވަރަށް އުފައްދާފައި ބާކީ ވެއްޖެ ކަމަށްވަނީނަނަމަ އެއެއްޗެހި ބާޒާރަށްވެސް ނެރެވޭނެކަމަށް ކޭޑް ވިިދާޅުވި އެވެ.
