ވެލިދޫ ދާއިރާގެ މެމްބަރު އައްބާސް އެކްސްގައި ކުރެއްވި ޕޯސްޓެއްގައި ވިދާޅުވީ ސަރުކާރު ހިންގާ ޕީއެންސީއަށް މެމްބަރުން އިތުރުުކުރުމަށް ސަރުކާރުގެ ކުންފުނިތަކުގެ ވެރިން ކުންފުނިތަކުގެ ބޭނުން ނަހަމަ ގޮތުގައި ހިފަމުންދާކަށެވެ. އެގޮތުން މެމްބަރުން އިތުރުކުރުމަށް ކުންފުނިތަކަށް ބިލްކުރާ ގޮތަށް ދަތުރުކުރާކަމަށް ވިދާޅުވެ އެކަމަކީ ރައްޔިތުންގެ ފައިސާއަށްް ގައްދާރުވުންކަމަށްް އައްބާސް ވިދާޅުވި އެވެ.
ސަރުކާރަށް ކޮރަޕްޝަން ތުހުމަތު ކުރައްވާ އެކްސްގައި ކުރެއްވި ޕޯސްޓުގެ އިތުރުން މުވައްޒަފުންނަށް ސަރުކާރުގެ ވަޒީރުން ވަޒީފާގެ ބިރު ދައްކަމުން ގެންދަވާކަމަށް ބުނެ އައްބާސް އެފްބީގައިވެސް ވަނީ ޕޯސްޓެއް ކުރައްވާފަ އެވެ.
އެ ޕޯސްޓްގައި އައްބާސް ވިދާޅުވީ ފެނިގެންދަނީ އެމްޑީއޭއަށް ހައްގުވާ ހިއްސާ ނުދީ ކޯލިޝަންގެ އެގްރިމެންޓްގައިވާ ވަޒީފާތައް ނުދީ އެމްޑީއޭ ކުރިއަރާ ރައްޔިތުންގެ ތާއީދު އެޕާޓީއަށް އިތުރުވަމުންދާ ތަން ފެނުމުން އެކަން ހަޖަމް ނުވެގެން އުޅޭ މަންޒަރުކަމަށެވެ.
އައްބާސް ވިދާޅުވީ ކޯލިޝަން އެއްބަސްވުން ހަދާ ސޮއިކުރުމުގެ ކުރިން ދެކި ވާހަކަތައް ހަދާން ނެތުމަކީ އިހްލާސްތެރިކަމާއި މެދު ސުވާލު އުފެދޭކަމެއްކަމަށެވެ.
ރައީސް ޑރ. މުއިއްޒުގެ އެދިވަޑައިގަތުމަށް ނޮވެމްބަރު މަސް އައުމުގެ ކުރިން ޕީއެންސީއަށް 75000 މެމްބަރުން ހަމަކުރުމުގެ މަސައްކަތް ކުރަމުންދާކަމަށް އެޕާޓީން ވަނީ ބުނެފައެވެ. އަދި އެކަމަށް އެކު އަތޮޅުތަކަށް އެޕާޓީން އަންނަނީ ދަތުރުކުރަމުންނެވެ.
