ރައީސް ޑރ. މުހައްމަދު މުއިއްޒު ފަލަސްތީނުގެ ރައީސް މަހުމޫދު އައްބާސްއާ އިއްޔެ ބައްދުކުރައްވައި، އިޒްރޭލުން ފަލަސްތީނުގެ ރައްޔިތުންނަށް އަމާޒުކޮށް ހިންގާ ހަނގުރާމަ ހުއްޓުވުމަށް ބައިނަލްއަގްވާމީ އެހީތެރިކަމަށް ފަލަސްތީނުގެ ރައީސް ވަނީ ރޭ އެދިވަޑައިގެންފަ އެވެ.
ރާއްޖެ އިން އަބަދުވެސް ގާތްގުޅުމެއް ބާއްވާ ފަލަސްތީނުގެ ރައީސް މަހުމޫދު އައްބާސްއާ ރައީސް މުއިއްޒު ބައްދަލުކުރެއްވީ އދ. ގެ އާންމު މަޖިލިހުގެ 79 ވަނަ ސެޝަންގައި ބައިވެރިވެވަޑައިގަތުމަށް މިހާރު އެމެރިކާ އަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
އެ ބައްދަލުވުމުގައި ފަލަސްތީނުގެ ރައީސް ވަނީ އެ ގައުމުގެ ރައްޔިތުންނާ ދެކޮޅަށް އިޒްރޭލުން ހިންގާ ޖަރީމާތައް ހުއްޓުވުމަށް ބައިނަލްއަގްވާމީ އެހީތެރިކަމަށް އެދިވަޑައިގެންފައި ކަމަށް ރައީސް އޮފީހުން ބުންޏެވެ.
ރައީސް މުއިއްޒާއި ފަލަސްތީނުގެ ރައީސް މަހުމޫދު އައްބާސް ބޭއްވި ބައްދަލުވުމަށް ފަހު މީޑިއާއާ ވާހަކަފުޅު ދައްކަވަމުމުން ރައީސް މުއިއްޒު ވިދާޅުވީ، ރާއްޖެ އަބަދުވެސް އޮންނާނީ ފަލަސްތީނާ އެކު ކަމަށެވެ. ކޮންމެ ތަނެއްގައި ވެސް ރާއްޖެ އިން އަޑު އުފުލާނީ ފަލަސްތީނުގެ ރައްޔިތުންގެ ދިފާއުގައި އެ މީހުންގެ ހައްގުގައި ކަމަށް އެ މަނިކުފާނު ވިދާޅުވި އެވެ.
މި ބައްދަލުކުރެއްވުމާ ގުޅިގެން މިނިސްޓަރު އާދަމް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ، މުޅި ދުނިޔޭގެ އެހީތެރިކަން ބޭނުންވެފައިވާ ފަލަސްތީނުގެ ހައްގުގައި ރައީސް ކުރައްވާ މަސައްކަތްޕުޅަކީ މުޅި އިސްލާމީ އުންމަތުގެ ހައްގުގައި ކުރައްވާ އަދި މުޅި އިންސާނިއްޔަތަށް ނަމުނާ މަސައްކަތްޕުޅެއް ކަމަށެވެ.
ރައީސް މުއިއްޒު ވެރިކަމަށް ވަޑައިގެންންނެވި ފަހުން ފަލަސްތީނާ އެއްކޮޅަށް އަދި އިޒްރޭލުގެ ޖަރީމާތަކާ ދެކޮޅަށް ސީދާ އެ މަނިކުފާނު ގެންދަވަނީ ދިވެހި ސަރުކާރުގެ ފަރާތުން ވަރަށް ގިނައިން އިސްވެ އަޑު އުފުއްލަވައި ވާހަކަފުޅު ދައްކަވަމުންނެވެ. ހާއްސަކޮށް އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ދޭ ވަރުގަދަ ހަމަލާތަކާ ދެކޮޅަށް ރައީސް މުއިއްޒު ވަނީ މިހާތަނަށް ވަރަށް ގިނައިން ޓުވީޓް ކުރައްވައި އަޑުއުފުއްލަވައިފަ އެވެ.
