ރައީސް މިހެން ވިދާޅުވީ އދގެ 79 ވަނަ އާއްމު މަޖިލީހުގައި ދެއްވި ތަގުރީރުގަ އެވެ. މިއީ، އެ މަނިކުފާނު އދ.ގެ އާންމު މަޖިލީހުގައި ތަގުރީރުކުރައްވާ ފުރަތަމަ ފަހަރެވެ.
ރައީސް މުއިއްޒު ވިދާޅުވީ، އިންސާނިއްޔަތު އޮތީ ވަރަށް ދެރަ ހާލުގައި ބޮޑު ކާރިސާއެއްގެ ތެރޭގައި ކަމަށެވެ. ބަނޑުހައިހޫނުކަމާއި ހަނގުރާމަތަކާއި ދިރިއުޅުމުގެ ހަރަދު އިންތިހާއަށް ބޮޑުވުން ފަދަ އެތައް ކަމެއްގެ ސަބަބުން މީހުން ވަރަށް ދެރަ، ދަތި ހާލުގައި އުޅެމުން އަންނަކަން އެ މަނިކުގާނު ފާހަގަކުރެއްވި އެވެ.
ރައީސް މުއިއްޒު ވިދާޅުވީ މިއަދު އެ މަނިކުފާނު އދ. ގައި ހުންނެވީ ގައުމު ގެންދަން ބޭނުންވާ މަންޒިލުގެ ތަސައްވުރަކާ އެކުގައި ކަމަށާއި އެއީ 2040 ވަނަ އަހަރާ ހަމައަށް އާދެވޭއިރު، ރާއްޖެ ފުރިހަމަ އަށް ތަރައްގީވެފައިވާ ގައުމަކަށް ހެދުން ކަމަށެވެ.
ރައީސް ވިދާޅުވީ، ރާއްޖެ އަށް 1965 ގައި މިނިވަންކަން އަލުން ލިބުނުއިރު، ރާއްޖެއަކީ ދުނިޔޭގެ އެންމެ ފަގީރު ގައުމުތަކުގެ ތެރޭގައި ހިމެނޭ ގައުމެއް ކަމަށާއި އާބާދީގެ ތިންބައިކުޅަ އެއްބައި މީހުން ލިޔަންކިޔަން ނުދަންނަ ކަމަށެވެ. ދިވެހިންގެ އެއްވެސް ސިނާއަތެއް ނެތްއިރު، އެކްސްޕޯޓް ކުރެވޭ އެއްޗެއް ވެސް ހަމަ ނެތް ކަމަށް ވިދާޅުވި އެވެ.
ނަމަވެސް، ދިވެހިން ވަނީ ކުޑަދުވަސްކޮޅެއްގެ ތެރޭގައި އެކަން ބަދަލުކޮށްފައި ކަމަށް އެ މަނިކުފާނު ވިދާޅުވި އެވެ. ރައީސް ވިދާޅުވީ އެންމެ ފަންސާހަކަށް އަހަރުގެ ތެރޭ ވަނީ މަތީ މެދުފަންތީގެ އާމްދަނީ ލިބޭ ގައުމެއްގެ ދަރަޖަ އަށް އާދެވިފައި ކަމަށާއި އެއީ ވަރަށް ބޮޑަށް ފަހުރުވެރިވެވަޑައިގަންނަވާ ކަމެއް ކަމަށެވެ.
ތަރައްގީވެފައިވާ ގައުމަކަށް ރާއްޖެ ހެދުމަށްޓަކައި ކުރަންޖެހޭ ކަމަކީ ރާއްޖޭގެ އުފެއްދުންތެރިކަމުގެ ގާބިލުކަމަށް އިންވެސްޓުކޮށް، އުފެއްދުންތެރިކަން އިތުރުކުރުން ކަމަށްވެސް ރައީސް ވިދާޅުވި އެވެ. އެކަމަށްޓަކައި ޑިޖިޓަލައިޒްކުރުމާއި، އިގުތިސާދު ސިންދަފާތުކުރުމާއި، ކަނޑުގެ ވަސީލަތްތައް އެންމެ ރަނގަޅަށް ބޭނުންކުރުމުގެ މުހިއްމުކަން އެމަަނިކުފާނު ފާހަގަކުރެއްވި އެވެ.
ރައީސް ވަނީ ދުނިޔެއަށް މިވަގުތު ބޮޑެތި މައްސަލަތަކެއް ކުރިމަތިވެފައިވާކަން ފާހަގަކުރައްވާފަ އެވެ. އަދި އެ މައްސަލަތަކުގެ ސަބަބުން އަސަރުނުކުރާ ގައުމެއް ނެތްކަމަށްވެސް އެމަނިކުފާނު ވިދާޅުވި އެވެ. ނަމަވެސް އެކަންކަމަށް ހައްލު ގެންނަން އެކަށީގެންވާ މަސައްކަތެއް ނުކުރެވޭކަން ރައީސްގެ ތަގުރީރުގައި ފާހަގަކުރެއްވި އެވެ.
