"ހައި ސީސް ޓްރީޓީ" އަކީ އދ. ގެ ބެލުމުގެ ދަށުން އެކުލަވާލާފައިވާ މުއާހަދާއެކެވެ. މި މުއާހަދާގެ މަގުސަދަކީ ގައުމުތަކުގެ ސަރަޙައްދުން ބޭރުގައިވާ ކަނޑުތަކާއި އޭގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމާއި ހިމާޔަތްކުރުމެވެ.
މި މުއާހަދާގައި ބައިވެރިވުމަކީ ދުނިޔޭގެ ކަނޑުތަކުގެ ބޮޑުބައެއް ހިމާޔަތްކޮށް ބެލެހެއްޓުމަށް އެޅޭ މުހިންމު ފިޔަވަޅެއް ކަމުގައި ސަރުކާރުން ބުނެ އެވެ. މި މުއާހަދާގައި ބައިވެރިވުމުން، ރާއްޖެއަކީ މި މުއާހަދާގެ "ސްޓޭޓް ޕާޓީ" އަކަށް ވަނީ ވެގެން ގޮސްފަ އެވެ.
މި މުއާހަދާގައި ބައިވެރިވުމަކީ، މިހާރު ނިއުޔޯކުގައި ކުރިއަށްދާ އދ. ގެ 79 ވަނަ ޖެނެރަލް އެސެމްބްލީގައި ރާއްޖެއިން ހާސިލުކުރި މުހިންމު ކާމިޔާބީއެއް ކަމުގައި ވެސް ސަރުކާރުން ވަނީ ބުނެފަ އެވެ.
މިނަމާޓާ ކޮންވެންޝަނުގައި ބައިވެރިވުމަށް ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހެޅުއްވީ މިދިޔަ ޑިސެންބަރުމަހުގެ 11 ވަނަ ދުވަހުގަ އެވެ. އަދި މަޖިލީހުން އެ މުއާހަދާގައި ބައިވެރިވުމަށް ފާސްކުރީ މިދިޔަ މެއިމަހުގެ 13ގައެވެ.
މިއާއެކު ރާއްޖެ ވެފައިވަނީ ހައި ސީސް ޓްރީޓީގައި ބައިވެރިވި ނުވަވަނަ ގައުމުގެ އިތުރުން، މިނަމާޓާ ކޮންވެންޝަނުގައި ބައިވެރިވި 150ވަނަ ގައުމަށެވެ.
މި ކަމާ ގުޅިގެން އެންވަޔަމަންޓް މިނިސްޓަރު ތޯރިގު އިބްރާހީމް އެކްސްގައި ކުރެއްވި ޕޯސްޓެއްގައި ވިދާޅުވީ ހައި ސީސް ޓްރީޓީގެ ސަބަބުން ދުނިޔޭގެ ބަޔޯޑައިވަސިޓީ ރައްކާތެރިކުރުމުގެ މަސައްކަތްތަކަށް ގިނަގުނަ ފައިދާތަކެއް ލިބޭނެ ކަމަށް އުއްމީދު ކުރައްވާ ކަމަށެވެ.
އަދި މިނަމާޓާ ކޮންވެންޝަނުގެ ދަށުން ކުރިޔަށް އޮތް އަހަރުތަކުގައި މާކިއުރީ ޕޮލިއުޝަން މަދުކުރުމާއި، ދުނިޔެ ހޫނުވުން ކުޑަކުރުމަށް ކުރާ މަސައްކަތުގައި ރާއްޖެއިން އެއްބާރުލުން ދޭނެ ކަމަށް މިނިސްޓަރު ވިދާޅުވިއެވެ.
