މިނިސްޓްރީން ބުނީ، މިހާތަނަށް ރާއްޖޭގެ 11 އަތޮޅެއްގައި މިނިސްޓްރީގެ ޓީމުތައް ވަނީ ހަރަކާތްތެރިވެފައިވާކަމަށެވެ. މީގެ ތެރޭގައި އައްޑޫ ސިޓީ، ފުވައްމުލައް ސިޓީ، ކ. އަތޮޅު، ބ. އަތޮޅު، ށ. އަތޮޅު، ހދ. އަތޮޅު، ހއ. އަތޮޅު، ގދ. އަތޮޅު، ގއ. އަތޮޅު، ލ. އަތޮޅު އަދި ފ. އަތޮޅު ހިމެނެއެވެ.
މަސްވެރިންގެ ރަސްމީ ދަފްތަރެއް އެކުލަވާލުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. ރައީސްގެ ސިޔާސަތަކީ މަސްވެރިންނަކީ ދައުލަތް ދަންނަ ބަޔަކަށް ހަދައި، ދައުލަތުގެ މުއައްސަސާއެއްގައި ދަފުތަރުވެފައި ތިބި ބަޔަކަށް ހެދުމެވެ.
ދަފުތަރުގެ މަސައްކަތް ނިމޭއިރު، ރާއްޖޭގައި މަހަށް ދުއްވާ ހުރިހާ ދޯންޏަކާއި، ކެޔޮޅުންނާއި އަދި ފަޅުވެރިންގެ ރަސްމީ މައުލޫމާތު ވުޒާރާގެ ޑޭޓާބޭސްގައި ރައްކާކުރެވި ބެލެހެއްޓިގެން ދާނެކަމަށް ވުޒާރާއިން މައުލޫމާތުދެއެވެ. މީގެ ސަބަބުން މަސްވެރިޔާއަކީ ދައުލަތް ބަލައިގަންނަ އަބުރުވެރި ފަރާތަކަށް ވެގެންދާނެ ކަމަށްވެސް ވުޒާރާއިން ފާހަގަކޮށްފައިވެއެވެ.
މި މަސައްކަތް ނިމުމުން، މަސްވެރިކަމާ ބެހޭ ތަރައްގީގެ މަޝްރޫޢުތައް އެންމެ އެދެވޭ ގޮތެއްގައި ފަރުމާކުރުމަށާއި މަސްވެރިންނަށް ބޭނުންވާ ހިދުމަތްތައް އެކަށީގެންވާ ގޮތެއްގައި ފޯރުކޮށްދިނުމަށް އެހީތެރިވެދޭނެ ކަމަށް އެ މިނިސްޓްރީން ބުނެއެވެ.
