މި ދަތުރުގައި 20 ދަތުރުވެރިން ހޮންކޮންގުން އެއާ އޭޝިއާގެ އޭ320 މަތިންދާބޯޓަކަށް އެރިއިރު، އެމީހުން ދަތުރުކުރަނީ ކޮންތާކަށްކަން އެނގުނީ މަތިންދާބޯޓު 30،000 ފޫޓުގެ އުސްމިނަށް އަރައި، ހޮންކޮންގާއި ކުއަލަލަމްޕޫރާ ދެމެދުގެ ސަރަހައްދަކަށް ދިޔުމުންނެވެ.
މި ސަޕްރައިޒް ދަތުރު ރާވާފައިވަނީ "ސީއެލްއެސް ހޮލިޑޭ" އާ ގުޅިގެންނެވެ. އަދި މި ދަތުރު މާކެޓްކޮށްފައިވަނީ "ނޯ ކްލޫ އެސްކޭޕް" ގެ ނަމުގައެވެ. މި ދަތުރަށް ޓިކެޓެއްގެ އަގަކީ 4،888 ހޮންކޮންގް ޑޮލަރު (634 އެމެރިކާ ޑޮލަރު) އެވެ. މި އަގުގައި ވެސް ގިނަ ބަޔަކު މި ދަތުރަށް ޝައުގުވެރިކަން ފާޅުކޮށްފައިވާކަން ފާހަގަކުރެވެއެވެ. އެހެންކަމުން މި ލިމިޓެޑް ޕެކޭޖް ވިއްކިފައިވަނީ ދުވަސްކޮޅެއްގެ ތެރޭގައެވެ.
ދަތުރުވެރިންނަށް ލިބުނު ހިތްގައިމު ސަޕްރައިޒަކީ ރާއްޖޭގެ ބަނޑޮސް ރިސޯޓުގައި ހޭދަކުރި ފުރިހަމަ ޗުއްޓީއެކެވެ.
މިފަދަ ސަޕްރައިޒް ދަތުރުތަކަކީ އެހެން އެއަރލައިންތަކުން ވެސް ފަށާފައިވާ އައު މާކެޓިންގ ކޮންސެޕްޓެކެވެ. އެސްއޭއެސް އާއި ވިޒް އެއާ ފަދަ އެއާލައިންތަކުން ވެސް މިފަދަ ދަތުރުތައް ރާވާފައިވެއެވެ. މި ދަތުރުތަކުގައި ބައިވެރިވި ފަރާތްތަކުން ސޯޝަލް މީޑިއާގައި މި ތަޖުރިބާއާ މެދު އުފާވާކަމަށް ބުނެފައިވާއިރު، ބައެއް މީހުން ބުނެފައިވަނީ ކޮންތާކަށްކަން ނޭނގި ޕެކްކުރުމަކީ އުނދަގޫކަމެއް ކަމަށެވެ.
