އެ މަނިކުފާނު މިފަދައިން ވިދާޅުވީ، އދ.ގެ ސަލާމަތީ މަޖިލީހުގައި ތަގުރީރުކުރައްވަމުންނެވެ.
އދ.ގެ މެންބަރު ގައުމަކަށް ރާއްޖެ އަށް ވިތާ 59 އަހަރު ފަހުން، އދ. ގެ ސަލާމަތީ މަޖިލީހުގައި ރާއްޖޭގެ ރައީސަކު ފުރަތަމަ ފަހަރަށް ބައިވެރިވެވަޑައިގެން ދެއްވި ބަޔާނުގައި ރައީސް މުއިއްޒު ވިދާޅުވީ ސީދާ އެ މަނިކުފާނު ވަޑައިގަތީ ދިވެހި ރައްޔިތުންގެ މެސެޖެއް ދެއްވުމަށް ކަމަށެވެ.
ފަލަސްތީނުގައި އިޒްރާއިލުން ހިންގަމުން އަންނަ ގަތުލުއާންމު ހުއްޓުވަން އދ. ނުކުޅެދިފައިވާކަން ފާހަގަކުރައްވައި އެ މަނިކުފާނު ވިދާޅުވީ ވީޓޯ ބާރުން ތަކުރާރުކޮށް އަންނަނީ ސަލާމަތީ މަޖިލީހުން އެ ކަމުގައި އަމަލުކުރުމުގެ ބާރު ކަނޑުވަމުން ކަމަށެވެ. އިޒްރޭލުން ހިންގާ ޖަރީމާތައް ހުއްޓުވުމުގައި ނާކާމިޔާބުވެފައި ވަނީ ވެސް ވީޓޯކުރުމުގެ ބާރު އޮންނާތީ ކަމަށް ރައީސް ވިދާޅުވި އެވެ.
އަދި ވީޓޯ ބާރުގެ ސަބަބުން އިސްރާއިލަށް ކުރިއަށްދާން ފުރުސަތު ލިބިފައިވާކަމަށާއި، އޭގެ ސަބަބުން މެދުއިރުމަތީގެ ސުލްހަ ގެއްލި، ގަދަބާރުން ވެރިވެގަނެ އާބާދުވުމުގެ ކަންކަން ހިނގަމުން އަންނަކަމަށެވެ.
ރައީސް އިތުރަށް ވިދާޅުވީ ސަލާމަތީ މަޖިލީހުގެ މެންބަރުން ދައުލަތްތަކުން ބިނާކުރި ގާނޫނުގެ ހުކޫމަތުގެ މައްޗަށް ބިނާވެފައި އޮންނަ، އަދުލުގެ ބިންގަލުގައި ބިނާކޮށްފައި އޮތް ބައިނަލްއަގުވާމީ ނިޒާމު، ސުންނާފަތިވެފައިވާ ހޮސްޕިޓާތަކާއި ގެދޮރާއި ސުކޫލުތަކުގެ ގާކުނީގެ ދަށުގައި ފުނޑެމުންދާ ކަމަށެވެ. އަދި ގާޒާއާއި ލުބުނާނުގައި މަރާލާފައިވާ މައުސޫމު އާންމުންގެ ހަށިތަކުގެ ބަރުދަނުގެ ދަށުވެ އެ ނިޒާމު ވިއްސިވިހާލިވަމުންދާ ކަމަށެވެ.
ސަލާމަތީ މަޖިލިހުގެ އެކުލަވައިލުން މި ޒަމާނަށް ނުފެތޭ ކަމަށް ރައީސް މުއިއްޒު ވިދާޅުވި އެވެ. މިސާލެއް ދައްކަވަމުން އެ މަނިކުފާނު ވިދާޅުވީ ތަރައްގީވަމުން އަންނަ ކުދި ޖަޒީރާ ގައުމުތަކަކީ އދ.ގެ މެންބަރު ގައުމުތަކުގެ ފަސް ބައިކުޅަ އެއް ބައި ކަމަށް ވާއިރު ވެސް ސަލާމަތީ މަޖިލީހުގައި އެ ގައުމުތަކަށް ގޮނޑިއެއް ނެތުމެވެ.
ރައީސް ވަނީ ކައުންސިލްގެ ގާބިލްކަން އިތުރުކުރުމަށް އަލުން މަސައްކަތް ފަށައި އިތުބާރު ހޯދުމަށް ގޮވާލައްވައިފަ އެވެ. އެކަމަކު އެކަން ކާމިޔާބުވާނީ ރާއްޖެ ފަދަ ކުދި ގައުމުތަކާ އެކު މުޅި ދުނިޔޭގެ ބައިވެރިވުން ލިބޭ ގޮތަށް ކުރާ މަސައްކަތުން ކަމަށް ރައީސް ތަކުރާރުކޮށް ވިދާޅުވި އެވެ.
އދ. ގެ ސަލާމަތީ މަޖިލީހުގައި ހިމެނޭ ވީޓޯ ބާރަކީ އެ މަޖިލީހުގެ ދާއިމީ މެމްބަރުންގެ ގޮތުގައި ހިމެނޭ ފަސް ގައުމުކަމަށްވާ ޗައިނާ، ފްރާންސް، ރަޝިއާ، އިނގިރޭސިވިލާތް، އަދި އެމެރިކާއަށް، ގަރާރު ތަންފީޒުކުރުމާމެދު އެއްބަސްވުމަށް ނުވަތަ ދެކޮޅު ވުމަށް ދީފައި އޮންނަ ބާރެކެވެ.
ވީޓޯކުރުމުގެ ބާރު ލިބިފައިވާ އެންމެ ގައުމަކުން ވެސް އެ މަޖިލީހަށް ހުށަހެޅޭ ގަރަރާކާ ދެކޮޅަށް ވޯޓު ދީފިނަމަ އެ ގަރާރެއްގެ މައްސަލަ އިތުރަށް ކުރިއަށް ނުދާނެ އެވެ. އެއީ ވީޓޯ ބާރު އޮތް އެހެން ގައުމަކުން ތާއީދުކުރި ނަމަވެސް މެއެވެ. މިއީ 1945ވަނަ އަހަރު އދ. އުފެއްދުނީންސުރެ ގިނަ ބައެއްގެ ފާނޑުކިޔުން އިތުރުވަމުންދާ "ބޮޑު" މައްސަލައެކެވެ.
