ކުޅުދުއްފުށި ސިޓީ ކައުންސިލުން ހުޅުވި ލައިބްރަރީ އަކީ ވަރަށް ޒަމާނީ ފެންވަރުގައި ހަދާފައިވާ ލައިބްރެރީއެއްކަމަށް ޔޫތް މިނިސްޓްރީން ބުނެއެވެ.
ޔޫތް މިނިސްޓްރީން ބުނީ ކުޅުދުއްފުށީ ސިޓީ ކައުންސިލުން އެ ލައިބްރެރީއަށް ފޮތްގަތުމަށް 63،000 އަށްވުރެގިނަ ރުފިޔާ ހަރަދުކޮށްފައިވާކަމަށެވެ.
ވިޔަފާރިތަކާއި ހައިކޮމިޝަންތަކާއި ބައެއް އިދާރާތަކާއި އަދި އާންމު ވެސް މި ކުތުބުހާނާއަށް ފޮތް ހަދިޔާކޮށްފައިވާއިރު ވަރަށް ގިނަ ހިދުމަތް މި ލައިބްރެރީން ލިބިގެންދާނެކަމަށް ޔޫތް މިނިސްޓްރީން ބުނެއެވެ.
މި ލައިބްރަރީގެ މެމްބަރަކަށްވުމަށްޓަކައި ކޮންމެ ފަރާތަކުންވެސް "ކުޅުދުއްފުށި ޕަބްލިކް ލައިބްރަރީގެ މެންބަރަކަށް ވުމަށް އެދޭ ފޯމު" އަދި ފޯމާއި އެކު ހުށަހަޅަންޖެހޭ ތަކެތި ހަމަކުރުމަށްފަހު ލައިބްރަރީއަށް ހުށައަޅަން ޖެހޭއިރު މެންބަރޝިޕް ހެއްދޭނީ މަދުވެގެން 3 މަހުގެ މުއްދަތަށްކަމަށް ޔޫތް މިނިސްޓްރީން ބުނެއެވެ.
އަދި 18 އަހަރުން ދަށުގެ ކުދިންނަށް މެންބަރަކަށް ވުމަށް އެއްވެސް ފީ އެއް ނުނެގޭނެ ކަމަށް ޔޫތް މިނިސްޓްރީން ބުނެއެވެ.
މި ލައިބްރަރީ ހުޅުވުމުގެ ރަސްމިއްޔާތުގައި މޭޔަރު އާތިފް އާއި ޑެޕިއުޓީ މޭޔަރު އަލީ އަހުމަދު އަދި ކައުންސިލް މެންބަރުންނާއި ޑެޕިއުޓީ މިނިސްޓަރު މުހައްމަދު އަހުމަދާއި ޕްރިންސިޕަލުންނާއި އަތޮޅު ކައުންސިލް މެންބަރުން އަދި މުއައްސަސާތަކުގެ ވެރިން ބައިވެރިވެވަޑައިގެންނެވިއެވެ.
