ހޮންކޮންގައި ބޭއްވި ބެލްޓް އެންޑް ރޯޑް އިނިޝިއޭޓިވް ޓެކްސް ކޯޕަރޭޝަން ފޯރަމްގައި ބްރިޓަކޮމްގެ މެމްބަރަކަށް ވުމުގެ އެއްބަސްވުމުގައި މީރާގެ ފަރާތުން ސޮއިކުރެއްވީ ކޮމިޝަނާ ޖެނެރަލް އޮފް ޓެކްސޭޝަން ހަސަން ޒަރީރެވެ.
ބްރޮޓަކޮމްއަކީ ބެލްޓް އެންޑް ރޯޑް އިނިޝިއޭޓިވް (ބީއާރްއައި) އަކީ ރީޖަންގެ ގައުމުތަކުގެ ޓެކްސް އިދާރާތަކުގެ މެދުގައި ގުޅުން ވަރުގަދަ ކުރުމަށާއި މެންބަރު ގައުމުތަކަށް ބޭނުންވާ ފަންނީ އެހީތެރިކަން ފަހިކޮށްދިނުމަށް ޓަކައި ޓެކްސް ކޯޕަރޭޝަން މެކޭނިޒަމެއް އެކުލަވައިލުމަށް އުފައްދާފައިވާ ޖަމިއްޔާއެކެވެ.
ބްރިޓަކޮމްގެ މެންބަރެއްގެ ހައިސިއްޔަތުން ތަފާތު ތަމްރީނު ޕްރޮގްރާމުތަކާއި މަޝްވަރާ ބައްދަލުވުންތަކުގައި މީރާގެ މުވައްޒުން ބައިވެރިވުމަށް ފުރުސަތު ލިބި، ޓެކުހުގެ ނިޒާމު ކުރިއަރާފައިވާ ގައުމުތަކުގެ ތަޖުރިބާ ދެނެގަނެ މީރާގެ މަސައްކަތްތައް އިތުރަށް ހަރުދަނާކުރުމުގެ ފުރުސަތު ލިބިގެންދާނެކަަމަށް މީރާއިން ބުނެއެވެ.
ބްރިޓަކޮމްގައި ބައިވެރިވުމުގެ މުހިންމުކަމާ މެދު ވާހަކަދައްކަވަމުން ކޮމިޝަނާ ޒަރީރު ވަނީ، ބީއާރްއައި ސަރަހައްދުގެ ޓެކްސް އިދާރާތަކުގެ މެދުގައި އޮންނަ ގުޅުން ރަނގަޅު ކުރުމަށް ޓަކައި ބްރިޓަކޮމްއިން އަދާކުރާ ދައުރާއި، ޓެކްސް އިދާރާތަކަށް ކުރިމަތިވެފައިވާ ގޮންޖެހުންތަކަށް ގުޅިގެން ހައްލު ހޯދާނެ ގޮތުގެ މައްޗަށް އަލިއަޅުވާލައްވާފައިވާކަމަށްް މީރާއިން ބުނެއެވެ.
ހަރުދަނާ ޓެކްސް ނިޒާމުތައް ބިނާކުރުމުގައި ސަރަހައްދީ އަދި ބައިނަލްއަގުވާމީ ގުޅުން ބަދަހިކުރުމުގެ މުހިންމުކަން ކޮމިޝަނަރާ ޒަރީރު ފާހަގަކުރެއްވިކަމަށް މިރާއިން ބުނެއެވެ.
މީރާގެ އަމާޒަކީ ބްރިޓަކޮމްގެ މެންބަރެއްގެ ހައިސިއްޔަތުން ލިބޭ ފުރުސަތުތަކުގެ ބޭނުން ހިފައި ޓެކުހުގެ އިދާރީ މަސައްކަތްތައް އެންމެ ފުރިހަމަ ގޮތުގައި ކުރިއަށް ގެންދެވޭނެ ގާބިލު މުއައްސަސާއެއްގެ ގޮތުގައި ދެމިއޮތުން ކަމަށްވެސް މިރާއިން ބުނެއެވެ.
