މި މުބާރާތް ކުރިއަށް ދާނީ މި މަހުގެ 27 ވަނަ ދުވަހުން ފެށިގެން އަންނަ މަހުގެ 12 ވަނަ ދުވަހުގެ ނިޔަލަށެވެ.
މި ހަރަކާތުގެ މައިގަނޑު މަޤްސަދަކީ ބައިވެރިންގެ ހުނަރު ދައްކާލުމުގެ އިތުރުން ރާއްޖޭގެ ހިތްގައިމު ރީތިކަމާއި މުއްސަނދި ސަގާފަތާއި ރާއްޖެއިން ފަތުރުވެރިންނަށް ލިބެން ހުރި ތަފާތު ތަޖުރިބާތައް މުޅި ދުނިޔެއަށް ދައްކާލުމެވެ. މުބާރާތުގައި ބައިވެރިވުމަށް ރާއްޖޭގެ ހިތްގައިމު ފޮޓޯތައް ނުވަތަ ވީޑިއޯތައް ސޯޝަލް މީޑިއާގެ އެކި ޕްލެޓްފޯމްތަކުގައި "މޯލްޑިވްސްމޫމަންޓްސް2024" ހޭޝްޓެގް ބޭނުންކޮށްގެން ހިއްސާކޮށް، ކުރު ތަފްސީލެއް ވެސް ހިމަނަންވާނެއެވެ.
މި މުބާރާތުގައި އުމުރުން 18 އަހަރު ފުރިފައިވާ ކޮންމެ މީހަކަށް ބައިވެރިވެވޭނެއެވެ. ކޮންމެ ބައިވެރިއަކަށް ވެސް އޮރިޖިނަލް ތިން އެންޓްރީއެއް ހުށަހެޅޭނެއެވެ. ފޮޓޯތައް ހުށަހަޅަންޖެހޭނީ 1:1 ރޭޝިއޯގައި އަދި ވީޑިއޯތައް ހުންނަންޖެހޭނީ 60 ސިކުންތަށް ވުރެ ދިގުނޫން، 16:9 ޕޯޓްރެއިޓް ފޯމެޓެއްގައެވެ. އޭއައި އިން އުފައްދާ ކޮންޓެންޓް މި މުބާރާތަށް ބަލައެއް ނުގަނެވޭނެއެވެ.
މުބާރާތުން އެއްވަނައަށް ހޮވޭ ފަރާތަކަށް ރެޑިސަން ބްލޫ ރިސޯޓް މޯލްޑިވްސްގައި 4 ރޭގެ ޚާއްޞަ ޗުއްޓީއެއް ލިބޭނެއެވެ. އަދި އެ ފަރާތުގެ ހުށަހެޅުން ވިޒިޓް މޯލްޑިވްސްގެ ސޯޝަލް މީޑިއާ ޗެނަލްތަކާއި އެހެނިހެން ޕްރޮމޯޝަނަލް ހަރަކާތްތަކުން ދައްކާނެއެވެ.
މި މުބާރާތަކީ ރާއްޖޭގެ ޖަޒީރާ ރީތިކަން ދުނިޔެއަށް ދެއްކުމުގެ މުހިންމު ފުރުޞަތެއްކަމަށް އެމްއެމްޕީއާރުސީން ފާހަގަކޮށްފައިވެއެވެ.
