ބަންގްލަދޭޝްގެ އެޑްވައިޒަރާއި ރައީސް މުއިއްޒު ބައްދަލު ކުރެއްވީ، އދ. ގެ 79 ވަނަ އާންމު މަޖިލީހުގައި ބައިވެރިވެ ވަޑައިގަތުމަށް ޓަކައި އެ މަނިކުފާނު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
ރައީސް ޑރ މުއިއްޒު ވަނީ ދެ ގައުމުގެ ތައުލީމީ ގުޅުން އިތުރަށް ބަދަހިކޮށް ދިވެހި ދަރިވަރުންނަށް ފުރުސަތު އިތުރު ހޯދުމާއި ގުޅޭގޮތުން ވާހަކަ ދައްކަވާފަ އެވެ. އަދި ދެ ގައުމުގެ ގުޅުން އިތުރު ހަރުފަތަށް ގެންދިއުމުގެ ޝައުގުވެރިކަން ފާޅު ކުރެއްވި އެވެ.
ނިންމާލަމުން ދެ ލީޑަރުން ވެސް ވަނީ ޑިޕްލޮމެޓިކް ގުޅުން ބަދަހިކޮށް، ހިއްސާވާ ކަންބޮޑުވުން ހުރި މައްސަލަތަކުގައި ސްޓްރެޓެޖިކް އެއްބާރުލުން ކުރިއަށް ގެންދިއުމަށް ހިދުމަތް ކުރައްވާކަން އަލުން ކަށަވަރުކޮށްދެއްވާފަ އެވެ. ކުރިއަށް އޮތްތަނުގައި ދެ ގައުމުގެ ގުޅުންތައް ފުންކޮށް ގާއިމް ކުރުމަށް ވައުދުވެފައިވާކަން ތަކުރާރުކުރި އެވެ.
އދ. ގެ އާންމު މަޖިލީހުގައި ބައިވެރިވެ ވަޑައިގަތުމަށް ރައީސް މުއިއްޒު ކުރައްވަމުން ގެންދަވާ ދަތުރުފުޅުގެ ތެރެއިން އެ މަނިކުފާނު ދަނީ އެކި ގައުމުތަކުގެ އިސްވެރީންނާ ބައްދަލު ކުރައްވައި، މުހިންމު ދާއިރާތަކުން މަޝްވަރާ ކުރައްމުންނެވެ.
މިއީ އެ މަނިކުފާނު އދ. ގެ މަޖިލީހަށް ހާޒިރުވެވަޑައިގެންނެވި، އަދި ތަގުރީރު ކުރެއްވި ފުރަތަމަ ފަހަރެވެ.
