ނަތަންޔާހޫ ތަގުރީރު ކުރެއްވީ މީގެކުޑައިރުކޮޅެއް ކުރިންނެވެ.
ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު ވިދާޅުވީ ރާއްޖޭގެ ވަފްދުން އެގޮތަށް އަމަލުކުރީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފަލަސްތީނާ މެދު ގެންގުޅުއްވާ ހާއްސަ ކަމާއި، ފަލަސްތީނުގެ ހައްގުގައި އެމަނިކުފާނު ކުރައްވަމުން ގެންދަވާ ހާއްސަ މަސައްކަތްޕުޅަށް އިހްތިރާމް ކުރެއްވުމުގެ ގޮތުން ކަމަށެވެ.
ފަލަސްތީނުގެ ރައީސް މަހްމޫދު އައްބާސްއާ ބައްދަލުކުރައްވާ ރައީސް ވަނީ ފަލަސްތީނަކީ މިނިވަން ދައުލަތެއްގެ ގޮތުގައި ބަލައިގަތުމަށް ބައިނަލްއަގްވާމީ ގޮތުން ކުރެވޭ މަސައްކަތް ތަކުގައި ދިވެހިރާއްޖެއިން ސާބިތުކަމާއެކު ދެމި އޮންނާނެކަމުގެ ކަށަވަރުކަން ދެއްވާފައި ކަން ވެސް ހީނާ ފާހަގަ ކުރެއްވި އެވެ.
މި މަހުގެ 25ވަނަ ދުވަހުގެ ރޭ ރައީސް އދ.ގައި ތަގުރީރު ކުރައްވަމުން ވެސް ވަރަށް ބޮޑަށް ވަނީ ފަލަސްތީނުގެ ހައްގުތައް ހޯދައިދިނުމަށް ވަކާލާތުކުރައްވައި، ދުނިޔެއަށް ވެސް ފަލަސްތީނުގެ ހިމާޔަތުގައި މަސައްކަތްކުރުމަށް ގޮވައިލައްވައިފަ އެވެ.
ރައީސް މުއިއްޒު ވިދާޅުވީ، އިޒްރޭލުން ފަލަސްތީނުގެ ކުށެއް ނެތް އަންހެނުންނާއި ކުޑަކުދިން މަރަމުން އެ ހިންގަނީ ޓެރަރިޒަމް ކަމަށެވެ. އެ ކަންކަމަށް ބައިނަލްއަގުވާމީ މައިދާނުގައި އިޒްރޭލު ޖަވާބުދާރީ ކުރުވަންޖެހޭ ކަމަށް ރައީސް ވިދާޅުވި އެވެ.
ރައީސް މުއިއްޒާއި ފަލަސްތީނުގެ ރައީސް މަހުމޫދު އައްބާސް ސަލާން ކުރައްވަނީ - ފޮޓޯ: ރައީސް އޮފީސް
އދ. ގެ އާންމު މަޖިލީހުގެ ބޮޑު އަގުލަބިއްޔަތަކުން މިދިޔަ މެއި މަހު ވަނީ އދ. ގެ ފުރިހަމަ މެމްބަރެއްގެ ގޮތުގައި ފަލަސްތީނު ބަލައިގަންނަން ވޯޓު ދީފަ އެެވެ. ނަމަވެސް އިޒްރޭލުގެ އެކުވެރި އެމެރިކާއިން ވަނީ ވީޓޯގެ ބާރުގެ ބޭނުންކޮށް އެ ނިންމުން ފެއިލްކޮށްލައިފަ އެވެ.
އެގޮތަށް ކަންތައްވެފައި ވަނިކޮށް މި މަހުގެ ތެރޭގައި އާންމު މަޖިލީހުން ފާސްކުރި ގަރާރަކުން ނިންމާފައި ވަނީ އާންމު މަޖިލީހުން ފަލަސްތީނަށް ގޮނޑިއެއް ދޭށެވެ. އެކަމަކު މި ގޮނޑި ލިބުނު ކަމުގައި ވިިޔަސް އާންމު މަޖިލީހުގެ ނިންމުންތަކުގައި ވޯޓު ދިނުމާއި ސަލާމަތީ މަޖިލީހުގެ މެންބަރަކަށް ވުމުގެ ހައްގެއް ނުލިބެ އެވެ.
މި މަހުގެ 18 ގައި ވެސް އދ. ގެ އާންމު މަޖިލީހުން ވަނީ ފަލަސްތީނުގެ ބިންތަކުގެ އިޒްރޭލު އެއް އަހަރު ތެރޭ ފައިބަން ގޮވާލާ ގަރާރެއް ފާސްކޮށްފަ އެވެ.
2023 އޮކްޓޫބަރު 23ގައި ގާޒާގެ މުސްލިމުންނާ ދެކޮޅަށް އިޒުރޭލުގެ އިސްތިއުމާރީ ބާރުތަކުން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ އަދަދު ވަނީ މިހާރު ވަނީ 41852އަށް އުފުލިފަ އެވެ. އޭގެ ތެރޭގައި 17800އަށްވުރެ ގިނަ އަދަދަކަށް މައުސޫމު ކުޑަކުދިން ހިމެނެ އެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ގާޒާގެ އޮފިޝަލުން ގަބޫލު ކުރެއެވެ.
އިސްރާއީލުގެ މި ގަތުލުއާންމުތަކަށް ވާގިވެރިވަނީ އެމެރިކާއާއި ޔޫރަޕްގެ ގައުމުތަކުންނެވެ. މި ގަތުލުއާންމުތައް ހިންގުމަށް ބޭނުންވާ ހަތިޔާރާއި ވަސީލަތްތަކާއި ހިމާޔަތް ވެސް އިސްރާއީލުގެ އިސްވެރިންނަށް ފާޅުގައި ދެނީ އެމެރިކާއާއި ޔޫރަޕްގެ ގައުމުތަކުންނެވެ.
