ކުރީގެ ރައީސް މައުމޫން ވިދާޅުވެފައިވަނީ އިޒްރޭލުން މިހާރު ކުރަމުންދާ ހަނގުރާމައިގެ އަސްލު އަމާޒަކީ ހަމައެކަނި ވަކި ޖަމާޢަތެއް ނޫން ކަމަށެވެ. އޭގެ ބަދަލުގައި އިޒްރޭލުގެ ހަނގުރާމައިގެ އަމާޒަކީ މުޅި މުސްލިމް އުންމަތް ކަމަށް އެމަނިކުފާނު ވިދާޅުވެފައިވެއެވެ.
މިއަދު ސޯޝަލް މީޑިއާގައި ކުރެއްވި ޕޯސްޓެއްގައި ރައީސް މައުމޫން ވިދާޅުވެފައިވަނީ އިޒްރޭލުން މި ހަނގުރާމަ ކުރަނީ ހަމައެކަނި ހިޒްބުﷲއާ ދެކޮޅަކަށް ނޫން ކަމަށެވެ. އޭގެ ބަދަލުގައި އެ ގައުމުން މި ހަނގުރާމަ ކުރަނީ ހުރިހާ އަރަބިންނާއި މުސްލިމުންނާ ދެކޮޅަށް ކަމަށް އެމަނިކުފާނު ފާހަގަކުރެއްވިއެވެ.
އިޒްރޭލުން ފަލަސްތީނުގެ ގައްޒާގައި ހިންގަމުންދާ ޢުދުވާނީ ޢަމަލުތަކާއި، ލުބްނާނަށް ދެމުންދާ ހަމަލާތަކަކީ މި ކަމުގެ ހެއްކެއް ކަމަށް ރައީސް މައުމޫން ވިދާޅުވެފައިވެއެވެ. އަދި ހުޅަނގުގެ ޤައުމުތަކުން މި ޙަޤީޤަތް އޮޅުވާލުމަށް މަސައްކަތް ކުރަމުންދާ ކަމަށް ވެސް އެމަނިކުފާނު ވަނީ ފާހަގަކުރައްވާފައެވެ.
