ނަސްރުﷲ އަވަހާރަކޮށްލީ ހިޒްބުﷲގެ މަރުކަޒަކަށް އަމާޒުކޮށް އިޒްރޭލުން ރޭ ވައިގެ މަގުން ދިން ހަމަލާއެއްގަ އެވެ. ނަސްރުﷲ އަވަހާރަކޮށްލާފައިވާ ކަމަށް އިޒްރޭލުން ރެއިން ފެށިގެން ބުނަމުން ދަނިކޮށް ހިޒްބުﷲ ޖަމާއަތުން ވެސް މިއަދު ވަނީ އެކަން ކަށަވަރު ކޮށްދީފަ އެވެ.
އިސްރާއީލުން އަވަހާރަކޮށްލަފާނެ ކަމުގެ ބިރު އޮތުމުން އާންމު ތަންތަނުން ނުފެންނަތާ އަހަރުތަކެއް ވެފައިވާ ނަސްރުالله އަކީ މެދުއިރުމަތީގެ އެންމެ މަޝްހޫރު އަދި އެންމެ ނުފޫޒުގަދަ އެއް ޝަހުސިއްޔަތެވެ.
އުމުރުން 64 އަހަރުގެ ނަސްރުއްﷲ އަވަހާރަކޮށްލުމާ ގުޅިގެން ލުބުނާނުން އިސްރާއީލަށް ދެން ދޭނީ ކިހާވަރެއްގެ ރައްދެއްކަން ސާފު ނުވާ ކަމަށް މަޝްރަހު ދިރާސާކުރާ ފަރާތްތަކުން ބުނެ އެވެ.
ހިޒްބުﷲ އިން ބުނީ ނަސްރުﷲ އަވަހާރަކޮށްލި ނަމަވެސް ފަލަސްތީނުގެ ހައްގުގައި އެ ޖަމާއަތުން ކުރަމުންދާ މަސައްކަތަށް އެއްވެސް ހުއްޓުމެއް ނާންނާނެ ކަމަށެވެ.
މިދިއަ ހޯމަދުވަހުން ފެށިގެން އިޒްރޭލުން ގެންދަނީ ދެކުނު ލުބުނާނަށާއި ބެއިރޫތަށް ވަރުގަދަ ހަމަލާތަކެއް ދެމުންނެވެ. މި ހަމަލާތަކުގައި މިހާތަނަށް 850އަށް ވުރެ ގިނަ މީހުން މަރުވެފައިވާ ކަމަށް ލުބުނާންގެ ސިއްހީ އިދާރާތަކުން ބުނެ އެވެ.
ޔަހޫދީ އިޒްރޭލުގެ ހަމަލާތަކުން މެދުއިރުމަތި ނުރައްކާތެރިވެފައިވާ މި ދަނޑިވަޅެއްގައި އީރާނުގެ ރޫހީ ވެރިޔާ އާޔަތުالله އަލީ އަލް-ހާމަންއީގެ ސަލާމަތީ ކަންކަން ވެސް ވަނީ ވަރުގަދަކޮށްފަ އެވެ. އީރާނަކީ ޔަހޫދީ ފައުޖާ ހަނގުރާމަ ކުރަމުންދާ ހިޒްބުاللهގެ އިތުރުން ފަލަސްތީނުގެ ހަމާސް ޖަމާއަތާއި ޔަމަނުގެ ހޫތީ ޖަމާއަތުގެ އެންމެ ބޮޑު މަދަދުގާރެވެ.
އަދި އިޒްރޭލު ފައުޖުން ދާދި ފަހުން ހަމާސްގެ އިސްވެރިޔާ އިސްމާއިލް ހަނިއްޔާ ޝަހީދުކޮށްލާފައި ވަނީ ވެސް އީރާނުގެ ވެރިރަށް ތެހެރާނުގައި ހުންނަވަނިކޮށެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ގާޒާގައި ހިންގަމުންދާ ގަތުލްއާންމުގައި ޝަހީދުވި މީހުންގެ އަދަދު ވަނީ 41،600 އަށް ވުރެ މައްޗަށް އަރާފަ އެެވެ.
