އިއްޔެ ބޭއްވި ވިލާކޮލެޖުގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ދަސްވެނިވި ދަރިވަރުންނާއި މުހާތަބުކޮށް ވާހަކަދައްކަވަމުން މިނިސްޓަރު ވިދާޅުވީ މުޅި ރާއްޖެ އިންތިޒާރުކުރަނީ ފަންނީ އެކި ރޮނގުތަކުން ދަސްވެނިވާ ދަރިވަރުންގެ ތަނަވަސް ހިޔާލުތަކާއި، އެ ދަރިވަރުންގެ އުންމީދީ ތަސައްވުރުތަކަށްކަމަށެވެ.
ރާއްޖޭގެ ތަރައްގީގެ ކުރިމަގު ބައްޓަންކުރުމުގައި މި ދުވަސްކޮޅަކީ މުހިންމު ދުވަސްކޮޅެއް ކަމަށް ހައިދަރުގެ ވާހަކަފުޅުގައި އެމަނިކުފާނު ފާހަގަކުރެއްވިއެވެ. އަދި ރާއްޖޭގެ ތަރައްގީގެ 20 އަހަރުގެ މާސްޓަ ޕްލޭން އެކުލަވާލުމަށް ކުރަންޖެހޭ މަސައްކަތްކުރަން ފެއްޓުމަށް ރައީސް ޑރ. މުހައްމަދު މުއިއްޒު ނިންމަވައިފައިވާކަމަށާއި، އެކަމަށް ތައުލީމީ ޒުވާނުންގެ ފުރިހަމަ އެއްބާރުލުން ބޭނުންވާނެކަމަށް މިނިސްޓަރު ވިދާޅުވިއެވެ.
ރައީސް ޑރ. މުއިއްޒު އދ. ގެ އާންމު މަޖިލީހުގެ 59 ބައްދަލުވުމުގައި ބައިވެރިވެވަޑައިގެން ދެއްކެވި ވާހަކަފުޅުގައި 2040 ވަނަ އަހަރުގައި ރާއްޖެއަކީ ތަރައްގީވެފައިވާ ގައުމަކަށް ހެއްދެވުމުގެ އަމާޒު ހާމަކުރެއްވިކަމަށާއި، އެ ލަނޑުދަނޑި ހާސިލުކުރުމަށް ފަންނީ އެކި ރޮނގުތަކުން ދަސްވެވެނިވާ އަދި ދަސްވެނިވެފައިވާ ތައުލީމީ ޒުވާނުންގެ ބައިވެރިވުން ނުހަނު ބޭނުންވާނެކަމަށް މިނިސްޓަރު ވިދާޅުވިއެވެ.
އޭގެއިތުރުން އެފަދަ އުސްމިންތަކަކަށް ރާއްޖެ ގެންދިއުމުގައި ރައްޔިތުންގެ ފުރިހަމަ ބައިވެރިވުމާއި އަމަލީ މަސައްކަތް ބޭނުންވާނެ ކަމަށް ފާހަގަކުރައްވައި ހައިދަރު ވިދާޅުވީ ވަކިން ހާއްސަކޮށް ދަސްވެނިން ފަދަ އިލްމީ ގާބިލު ރައްޔިތުންގެ ހިއްސާ އެކަމުގައި ބޮޑު ކަމަށެވެ.
އިއްޔެ ބޭއްވި ވިލާ ކޮލެޖުގެ ދަސްވެނިވުމުގެ ދެ ރަސްމިއްޔާތުގައި ޖުމުލަ 796 ދަރިވަރުން ވަނީ ދަސްވެނިވެފައެވެ.
