މީރާއިން ބުނީ މި ފައިސާ ހޯދީ ތަކުރާރުކޮށް ގުޅައިގެންނާއި ކޯޓް މަރުހަލާ މެދުވެރިކޮށްކަމަށެވެ. 

އެ އިދާރާއިން ބުނީ މިދިޔަ ހަ މަސް ތެރޭ ތަކުރާރުކޮށް ގުޅައިގެން ދައުލަތަށް ލިބެންޖެހޭ 515 މިލިއަން ރުފިޔާ  ހޯދައިފައިވާކަމަށެވެ. މިގޮތުން ޑިއުޒް ކްލިއަރެންސްގެ ގޮތުގައި 93 މިލިއަން ރުފިޔާ އަދި  ބޭންކް އެކައުންޓު ފްރީޒްކޮށްގެން 21 މިލިއަން ރުފިޔާ ހޯދައިފައިވާކަމަށް ޓެކްސްގެ ކަންކަން ބަލަހައްޓާ މީރާއިން ބުނެއެވެ. މީގެއިތުރުން އޯވަޑިއުވެފައިވާ ޕޭމެންޓްތަކުގެ ގޮތުގައި 12 މިލިއަން ރުފިޔާ ހޯދިފައިވާކަމަށްވެސް މީރާއިން ބުނެއެވެ.

ޓެކްސް ދައްކަން ޖެހޭ ފަރާތްތަކަށް ޓެކްސް ދައްކަން ހަނދާންކޮށްދީގެން ހޯދި އަދަދު 135،000 ރުފިޔާއަށް އަރައެވެ. ކޯޓު މަރުހަލާ މެދުވެރިކޮށް ހޯދި އަދަދަކީ 10،000 ރުފިޔާއެވެ.

މީރާ އިން ބުނީ ޓެކުހާއި ކުލީގެ ގޮތުގައި ދައުލަތަށް ލިބެންޖެހޭ އަދަދު  10 ބިލިއަން ރުފިޔާއަށް އަރާކަމަށެވެ.  އޭގެތެރޭގައި ޓެކްސްގެ ގޮތުގައި ނުލިބޭ 5.5 ބިލިއަން ރުފިޔާ އާއި ރިސޯޓު ކުލީގެ ގޮތުގައި ނުލިބި ހުރި 4.3 ބިލިއަން ރުފިޔާ ހިމެނޭކަމަށް މީރާގެ ހިސާބުތަކުން ދައްކައެވެ.