އިސްރާއީލު އަސްކަރިއްޔާއިން ބުނި ގޮތުގައި ރޭ އިސްރާއީލު ބޯޑަރާ އިންވެފައި ހުރި ލުބުނާނުގެ ބައެއް އަވަށްތަކުގައި ހިންގަން ފެށި އޮޕަރޭޝަނަކީ އެ ތަންތަނުގައި ހަރަކާތްތެރިވާ ހިޒްބުﷲގެ ހަނގުރާމަވެރިންނަށް އަމާޒުކޮށްގެން ފެށި އޮޕަރޭޝަނަކެވެ.
އެއްގަމު މަގުން ހިންގާ މި އޮޕަރޭޝަނުގައި ބައިވެރިވާ ސިފައިންނަށް އެހީވުމުގެ ގޮތުން ވައިގެ އުޅަނދުތައް ވެސް ހަރަކާތްތެރިވާނެ ކަމަށް އިޒްރޭލުން ބުނެ އެވެ.
މި އޮޕަރޭޝަން އިޒްރޭލުން ފެށީ އެގައުމުގެ ސެކިއުރިޓީ ކެބިނެޓުން ރޭ އެކަމަށް ހުއްދަ ދިނުމާ ގުޅިގެންނެވެ.
ހިޒްބުﷲ އިން ބުނީ އެއްގަމުން އެރި އިޒްރޭލުގެ ބައެއް ސިފައިންނަށް އަމާޒުކޮށް ހަމަލާތަކެއް ދީފައިވާ ކަމަށާއި ބައެއް ހަމަލާތައް ކާމިޔާބު ކަމަށެވެ. އަދި ދިގުލައިގެންދާ ހަނގުރާމައެއް ކުރުމަށް އެ ޖަމާއަތް ތައްޔާރު ކަމަށެވެ.
މިއީ އިޒްރޭލުން 2006 ގެ ފަހުން ލުބްނާނަށް އެއްގަމުން އަރައިގަނެ، ހަމަލާތައް ދޭން ފެށި ފުރަތަމަ ފަހަރު ކަމަށްވާއިރު ފާއިތުވެދިޔަ ދެ ހަފްތާގައި ވައިގެ މަގުން މެދުނުކެނޑި އިޒްރޭލުން ދިޔައީ ލުބްނާނަށް ހަމަލާ ދެމުންނެވެ.
ލުބްނާނުގެ ހެލްތު މިނިސްޓްރީން ބުނީ ފާއިތުވެދިޔަ 24 ގަޑިއިރު ތެރޭގައި އިޒްރޭލުން ދިން ހަމަލާތަކުގައި 95 އަށް ވުރެ ގިނަ މީހުން މަރުވެފައިވާ ކަމަށާއި އަދި ޖުމްލަ މަރުވި މީހުންގެ އަދަދު 1،000 އަށްވުރެ ގިނަ ކަމަށެވެ.
އިޒްރޭލުން ލުބްނާނަށް ދެމުން އަންނަ ހަމަލާތައް ފާއިތުވި ދެ ހަފްތާތެރޭ އިތުރަށް ވަރުގަދަކުރިއިރު، އެގައުމުން އަންނަނީ ފަލަސްތީނުގެ ގާޒާގައި ވެސް ބޮޑު ގަތުލްއާންމެއް ހިންގަމުންނެވެ. އެ ގަތުލްއާންމުގައި މިހާތަނަށް ގާޒާ އިން ވަނީ 41،000 އަށް ވުރެ ގިނަ މީހުން މަރުވެފަ އެވެ.
ލުބްނާންގެ އިތުރުން، ހޫތީންނަށް އަމާޒުކޮށް ޔަމަނަށް ވެސް އިޒްރޭލުން ދަނީ ޑްރޯން ހަމަލާތައް ދެމުންނެވެ.
މެދުއިރުމަތީގެ ހުރިހާ ސަރަހައްދަކަށް އިޒްރޭލުގެ އަސްކަރިއްޔާގެ ބާރު ފޯރާނެ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހު ވަނީ ބުނެފަ އެވެ.
