މިކަން ހާމަކުރެއްވީ އާ ޕްރޮސެކިއުޓާ ޖެނެރަލް އައްބާސް ޝަރީފެވެ. މިއަދު ބޭއްވި ނޫސްވެރިންގެ ބައްދަލުވުމުގައި އޭނާ ވިދާޅުވި ގޮތުގައި މި ނިޒާމުގެ ދަށުން ޝަކުވާ ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ.
އައްބާސް ޝަރީފް ވިދާޅުވި ގޮތުގައި ފާއިތުވި ތިން ހަފްތާގެ ތެރޭގައި އެކި ވަސީލަތްތައް މެދުވެރިކޮށް ގިނަ ބައެއްގެ ފަރާތުން ޝަކުވާތައް ލިބެމުން އައިސްފައިވެއެވެ. މި ސަބަބަށްޓަކައި، ޝަކުވާތައް ރަސްމީކޮށް ހުށަހެޅުމުގެ ނިޒާމެއް ޕީޖީ އޮފީހުގެ ވެބްސައިޓާއި އެކި ގޮފިތަކުގައި މިހާރު ވަނީ ގާއިމުކޮށްފައެވެ. މި ނިޒާމުގެ ދަށުން ޝަކުވާ ހުށަހެޅުމުގެ ފުރުސަތު 20 ދުވަހުގެ މުއްދަތަށް ހުޅުވާލާފައިވާ ކަމަށް އޭނާ ވިދާޅުވިއެވެ.
މި އައު ނިޒާމުގެ ދަށުން ލިބޭ ހުރިހާ ޝަކުވާއެއް ޕީޖީ އޮފީހުގައި އެކުލަވާލެވޭ ހާއްސަ ޓީމަކުން ވަކިވަކިން ދިރާސާކޮށް ބަލާނެ ކަމަށް އައްބާސް ޝަރީފް ވިދާޅުވިއެވެ.
އެއްވެސް މައްސަލައެއް އަމިއްލަ އިސްނެގުމަކަށް ނުބައްލަވާނެ ކަމަށްވެސް އޭނާ ވަނީ ހާމަކުރައްވާފައެވެ. މި ނިޒާމަކީ ޕީޖީ އޮފީހުގެ ޒިންމާދާރުކަން އިތުރުކޮށް، ރައްޔިތުންގެ އިތުބާރު ހޯދުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.
