އެމަނިކުފާނުން މިހެން ވިދާޅުވީ އިޒްރޭލުން ފަލަސްތީނުގައި ހިންގަމުން ދަނީ ނަސްލު ނައްތާލުމުގެ އަމަލުތަކެއް ކަމަށް ބުނެ ސައުތު އެފްރިކާ އިން އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އަށް ހުށަހަޅާފައިވާ މައްސަލަގައި ރާއްޖެ ބައިވެރިވާން ހުށައެޅިކަން ހާމަކުރައްވާ އެކްސްގައި ކުރެއްވި ޕޯސްޓެއްގައެވެ.
ރައީސް ޑރ. މުއިއްޒު ވިދާޅުވީ ގައްޒާގައި އިޒްރޭލުން ހިންގާ ގާނޫނާ ހިލާފު އަމަލުތަކަށް ޖަވާބުދާރީވާން ޖެހޭނެކަމަށެވެ. އަދި ގާނޫނުގެ ވެރިކަން ދަމަހައްޓައި، އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ޖަރީމާތައް ހުއްޓާލަން ޖެހޭކަމަށްވެސް އެމަނިކުފާނު ވިދާޅުވިއެވެ.
ރާއްޖެއިން އަބަދުވެސް ސުލްހައާ އަދުލް އިންސާފަށް އެއްބާރުލުން ދޭނެކަން ފާހަގަކުރައްވަމުން ރައީސް ވިދާޅުވީ ރާއްޖެއިން ފަލަސްތީނު ރައްޔިތުންނާއި އެކު ދެމި ތިބޭނެކަމަށެވެ.
އިތުރަށް ކިޔާލުމަށް : އިޒްރާއީލު މައްސަލައަށް ރާއްޖެއިން ވަންނަން ހުށައަަޅައިފި
ރައީސް ޑރ މުއިއްޒު ވިދާޅުވީ ފަލަސްތީނު ގެ މިނިވަންކަން ބަލައިގަނެ އެ ގައުމު ބަލައިގަންނަން ޖެހޭނީ 1967 ގެ ކުރިން އިރުމަތީ ގުދުސްއަކީ އެ ގައުމުގެ ވެރިރަށުގެ ގޮތުގައި އޮތް ބޯޑަރުތަކުގެ މައްޗަށް ބިނާކޮށްކަމަށެވެ.
