ރައީސްގެ ޕޯސްޓުގައި ވިދާޅުވީ ޝިގެރު އިޝިބާގެ ވެރިކަމުގައި ޖަޕާނަށް އިތުރު ތަރައްގީއާއި ކުރިއެރުން ލިބޭނެކަމަށް ޔަގީންކުރައްވާ ކަމަށެވެ.
ބޮޑުވަޒީރުގެ މަގާމު އަދާކުރެއްވުމުގައި ކާމިޔާބީއަށް އެދިވަޑައިގެން ރައީސް ވަނީ ޖަޕާނުގެ އާ ސަރުކާރާ ގުޅިގެން ދެ ގައުމުގެ ޒަމާންވީ ރަހުމަތްތެރިކަމުގެ ގުޅުން އިތުރަށް ހަރުދަނާ ކުރައްވަން މަސައްކަތް ކުރައްވާ ކަމަށްވެސް ވިދާޅުވެފަ އެވެ.
ރާއްޖެއާއި ޖަޕާނާ ދެމެދު ސިޔާސީ ގުޅުން ގާއިމްކޮށްފައިވަނީ 14 ނޮވެމްބަރު 1967ވަނަ އަހަރު އެވެ. މި ގުޅުމަށް މިއަހަރު 57 އަހަރު ފުރޭނެ އެވެ.
ޖަޕާނުގެ ބޮޑުވަޒީރު ކަމުގެ މަގާމާ ހަވާލުވެ ވަޑައިގެންނެގި ޝިގެރު އިޝިބާ އޭނާގެ އާ ކެބިނެޓު އެކުލަވައިލައްވައިފި އެވެ. ޖަޕާންގެ ބޮޑުވަޒީރު ކަމުގެ މަޤާމު އިޝިބާ ކަށަވަރު ކުރެއްވީ, ވެރިކަން ކުރާ ލިބަރަލް ޑިމޮކްރެޓިކް ޕާޓީ (އެލްޑީޕީ)ގެ އެތެރޭގެ އިންތިޚާބުގައި, ވާދަވެރި އަށް ކެނޑިޑޭޓެއްގެ މައްޗަށް ކުރި ހޯއްދަވައިގެންނެވެ. 67 އަހަރުގެ އިޝިބާއަކީ ކުރިން ދިފާޢީ ވަޒީރު ކަމުގެ މަގާމު ފުރުއްވާފައިވާ ބޭފުޅެކެވެ.
ޖަޕާނުގެ ޕްރައިމް މިނިސްޓަރަކަށް އިޝިބާ އައްޔަންކުރީ އެގައުމުގެ ކުރީގެ ޕްރައިމް މިނިސްޓަރު ފުމިއޯ ކިޝިދާ މަގާމުން ވަކިވެވަޑައިގަތުމާ ގުޅިގެންނެވެ.
ކިޝިދާ މަގާމުން ވަކިވެވަޑައިގެން މިދިޔަ މަހު ބޭއްވި އިންތިހާބުގައި ސަރުކާރު ހިންގާ, ލިބަރަލް ޑިމޮކްރެޓިކް ޕާޓީ (އެލްޑީޕީ)ގެ ލީޑަރުގެ މަގާމަށް އަލުން ވާދަނުކުރައްވާނެކަމަށް ނިންމެވި އެވެ.
