ދައުލަތުގެ މީޑިއާ މެދުވެރިކުރައްވައި ރައިތުންނަށް ބޭންކުގެ މައުލޫމާތު އޮޅުން ފިލުވައިދެއްވަމުން ގަވަރުނަރު ވިދާޅުވީ ޑިވެލޮޕްމަންޓް ބޭންކަށް ލައިސަންސް ދިނުމަށް ކުރަންޖެހޭ ދިރާސާތައް ނިމި، އެމްއެމްއޭގެ ބޯޑުން ވަނީ ލައިސަންސް ދޫކުރުމަށް ފާސްކޮށްފައިވާކަމަށެވެ. އަދި މި ހަފުތާ ތެރޭގައި ބޭންކުގެ ލައިސަންސް ދޫކުރެވި، ވަރަށް އަވަހަށް ބޭންކުގެ މަސައްކަތް ފެށިގެންދާނެ ކަމަށް އުއްމީދު ކުރައްވާ ކަމަށްވެސް ވިދާޅުވިއެވެ.
ޑިވެލޮޕްމަންޓް ބޭންކް ގާއިމުކުރެވޭނީ މާލޭގެ ޗާންދަނީމަގާއި އަމީރު އަހުމަދު މަގު ގުޅޭ ހަތަރުއަނގޮޅީގައި ހުންނަ އެލައިޑް ބިލްޑިންގްގެ ތިރީ ބައިގައެވެ. މި ބޭންކަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ފުރިހަމަކުރުމުގެ ގޮތުން ގާއިމުކުރެވޭ ރާއްޖޭގެ ފުރަތަމަ ޑިވެލޮޕްމަންޓް ބޭންކެވެ.
ބޭންކުގެ އިސް މަޤާމުތަކަށް ބޭރުގެ ތަޖުރިބާކާރުން ވަނީ އައްޔަންކުރެވިފައެވެ. މިގޮތުން ސީއީއޯގެ މަޤާމަށް އިނގިރޭސިވިލާތުގެ ނޮއެލް ގްރެގާ އަދި ޗެއާޕާސަންގެ މަގާމަށް ސިންގަޕޫރުގެ އަރޫނީ ގުނިޓެލެކީ ވަނީ ހަމަޖެހިފައެވެ. އަރޫނީއަކީ ބައިނަލްއަގްވާމީ މާލީ މާކެޓުގައި 25 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ މާލީ ދާއިރާގެ މާހިރެކެވެ.
