ޑޮލަރުގެ މައްސަލަ ހައްލުކުރުމަށް ސަރުކާރުން އެޅި ފިޔަވަޅުތަކަށް އެމްޑީޕީގެ ޗެއަރޕާސަން ފައްޔާޒް އިސްމާއީލް މަރުހަބާ ވިދާޅުވެއްޖެއެވެ.
Advertisement
އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ މި ފިޔަވަޅުތަކުގައި އިތުރަށް ރަނގަޅު ކުރަންޖެހޭ ކަންތައްތަކެއް ވެސް އެބަހުރި ކަމަށެވެ.
ފަތުރުވެރިކަމުން ލިބޭ އާމްދަނީ ރާއްޖޭގެ ބޭންކިން ނިޒާމު ތެރެއިން ޖަމާކުރުމަށް ސަރުކާރުން ނިންމި ނިންމުމަކީ "ބޭރު ފައިސާގެ ދަތިކަން ހައްލު ކުރުމަށް ރައީސް ޑރ. މުހއްމަދު މުއިއްޒުގެ ސަރުކާރުން ނިންމި އެންމެ ނަތީޖާ ނެރެދޭނެ ނިންމުން" ކަމަށް ފައްޔާޒް ވިދާޅުވި އެވެ.
މި ނިންމުން ތަންފީޒު ކުރުމުގައި ބައެއް ކަހަލަ ބަދަލުތައް ގެންނަން ޖެހޭ ކަމަށް އޭނާ ދެކެވަޑައިގަންނަވާ ކަމަށް ވިދާޅުވިއެވެ.
ފައްޔާޒް ވިދާޅުވީ ސަރުކާރުން މި ނިންމުން މުރާޖައާކޮށް، ފަތުރުވެރިއަކަށް ޑޮލަރުގެ ރޭޓެއް ކަނޑައެޅުމުގެ ބަދަލުގައި، ލިބޭ ބޭރު ފައިސާގެ ވަކި އިންސައްތައެއް ކަނޑައަޅަން ޖެހޭ ކަމަށެވެ.
"މިހާރު އޮތް ގޮތުން، މި ސިޔާސަތުގެ ސަބަބުން ފަތުރުވެރިންގެ އަތުން ދިވެހި ރުފިޔާ ލިބެމުން އަންނަ ގެސްޓް ހައުސްތަކާއި ދަށްފަންތީގެ ރިސޯޓުތަކަށް ގެއްލުން ލިބިދާނެ،" ކަމަށް އޭނާ ފާހަގަ ކުރެއްވިއެވެ.
ގެސްޓްހައުސްތަކާއި ސަފާރީތަކުގެ މެދުގައި ތަފާތު ކުރުންތަކުގެ ސަބަބުން މެދުފަންތީގެ ރިސޯޓުތަކަށް ވަރަށް ބޮޑަށް އަސަރުކުރާނެ ކަމަށް ވެސް އޭނާ ވަނީ ވިދާޅުވެފަ އެވެ. މި ކަންކަމާ ގުޅޭގޮތުން ސްޓޭކްހޯލްޑަރުންގެ މެދުގައި މަޝްވަރާކޮށް، މިހާރު އޮތް ގަވާއިދު މުރާޖައާ ކުރުމަށް ސަރުކާރާއި އެމްއެމްއޭއަށް ފައްޔާޒް ވަނީ އިލްތިމާސް ކުރައްވާފަ އެވެ.
ގަވާއިދަށް އަންގާރަ ދުވަހު ގެނެވުނު ބައެއް ބަދަލުތައް:
- ކެޓަގަރީ "އޭ" ގައި ހިމެނޭ ފަރާތްތަކުން (ޓޫރިސްޓް ރިޒޯޓުތައް، އިންޓަގްރޭޓަޑް ޓޫރިސްޓް ރިޒޯޓުތައް، ރިޒޯޓް ހޮޓާތައް، ހޮޓާތައް، އަދި ޓޫރިސްޓް އުޅަނދުތައް) ކޮންމެ ޓޫރިސްޓަކަށް 500 ޑޮލަރުގެ ރޭޓުން ބޭންކަކަށް ރުފިޔާއަށް މާރު ކުރަން ޖެހޭ ގޮތަށް ހަމަޖެއްސުން.
- މީލާދީ މަހެއްގައި އައިސްފައިވާ ޖުމްލަ ޓޫރިސްޓުންގެ އަދަދަށް ބިނާކޮށް މާރު ކުރަންޖެހޭ އަދަދު ހިސާބު ކުރުން.
- ޓޫރިޒަމް ދާއިރާގެ ހުރިހާ ފެސިލިޓީތަކަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރު ކުރަން ޖެހޭ ގޮތަށް ހަމަޖެއްސުން.
އެމްއެމްއިން އިއްޔެ އަމަލު ކުރަން ފެށި އާ ދެ ގަވާއިދުގައިވާ ގޮތުން ޓޫރިޒަމް ދާއިރާ އަށް ބޭރު ފައިސާ އިން ލިބޭ އާމްދަނީން އަހަރަކު ޖުމްލަ 750 މިލިއަން ޑޮލަރާ ހަމައަށް ރާއްޖޭގެ ބޭންކުތަކުން މާރުކުރަން ދެން މަޖުބޫރުވާނެ އެވެ.
