މި ހާދިސާ ހިނގީ ރޭ އީރާނުން އިސްރާއީލަށް އަމާޒުކޮށް 180 ބެލިސްޓިކް މިސައިލް ހަމަލާ ދިން ވަގުތުއެވެ.
ޝަހީދުވި މީހާއަކީ ގައްޒާގެ ޖަބާލިޔާގެ ރައްޔިތެއް ކަމަށްވާ 37 އަހަރުގެ ސާމެހް އަލް-އަސަލީއެވެ. އޭނާ ޝަހީދުވީ ވެސްޓް ބޭންކުގެ ޖެރިކޯ ކައިރީގައި ހުރި ނުއެއިމާ ރަށުގައި ހުއްޓައި މިސައިލްގެ ބައެއް ވެއްޓިގެންނެވެ. ސާމެހްއަކީ 3 ކުދިންގެ ބައްޕައެކެވެ.
އިސްރާއީލުގައި މި ހަމަލާގައި ޒަހަމްވީ ދެ މީހުންނެވެ. އެ ދެމީހުން ޒަހަމްވީ ޓެލް އަވީވްގައެވެ. މީގެ އިތުރުން ގިނަ ބަޔަކު ސަލާމަތްވުމަށް ދުވުމުގެ ސަބަބުން ކުދިކުދި އަނިޔާތައް ވެފައިވާ ކަމަށް އިޒްރޭލުގެ ޑިންސް މިނިސްޓްރީގެ އޮފިޝަލެއްކަމަށްވާ މަގެން ޑޭވިޑް އަޑޮމްއިން ބުނެފައިވެއެވެ.
އިސްރާއީލުގެ ޑިފެންސް ފޯސްއިން ބުނެފައިވަނީ އެމެރިކާގެ އެހީތެރިކަމާއެކު ގިނަ އަދަދެއްގެ މިސައިލްތައް އިންޓަރސެޕްޓް ކުރެވުނު ކަމަށެވެ. އަދި ޖޯޑަނުން ވެސް އެ ގައުމުގެ މަތިން ދިޔަ ބައެއް މިސައިލްތަކާއި ޑްރޯންތައް އިންޓަރސެޕްޓް ކުރި ކަމަށް ބުނެފައިވެއެވެ.
