ޖޯރޭއަކީ ނޫސްވެރިކަމުގެ ދާއިރާގައި، ހައްސަކޮށް ފޮޓޯގްރަފީގެ ދާއިރާއިން ގިނަގުނަ ހިދުމަތްތަކެއް ކޮށްދީފައިވާ މޮޅު މީހެކެވެ. ކެމެރާތަކުން ޖޯރޭގެ ފޮޓޯ ނެގިފައި ހުރިލެއް މަދު ނަމަވެސް، ޖޯރޭ ނެގި މުހިންމު ފޮޓޯތައް މަދެއް ނުވާނެއެވެ.
އޭނާގެ ކެމެރާގެ ލެންސުން ރާއްޖޭގެ ސިޔާސީ އަދި އިޖްތިމާއީ ހަޔާތުގެ އެތައް މުހިންމު ވަގުތުތަކެއް ދިވެހި ތާރީހަށް ރެކޯޑުކޮށްދީފައިވެއެވެ. ހައްސަކޮށް 2005 ވަނަ އަހަރު ފެށުނު އިސްލާޙީ ހަރަކާތްތަކުގެ ތެރެއިން ހިނގި ކަންކަމުގެ ފޮޓޯތައް ނެގުމުގައި ޖޯރޭ ވަނީ ވަރަށް ހަރަކާތްތެރިކޮށް މަސައްކަތްކޮށްފައެވެ.
ޖޯރޭ އަކީ މަޖާ ރަހުމަތްތެރިއެވެ. ކުލުނުވެރި ބަފައެކެވެ. ހިތްތިރި މީހެކެވެ. ތިމާވެއްޓާ މެދު ވިސްނާމީހެކެވެ. ގައުމާމެދު ވިސްނާ މީހެކެވެ. ސިޔާސީ ވާހަކަ ދައްކާ ހިތްވާ މީހެކެވެ.
އޭނާއާއި އެންމެ ފަހުން ބައްދަލުވީ ފެން މޯޓެއް މަރާމާތު ކުރަން އޭނާ އައުމުންނެވެ. ހައިރާންވިއެވެ. އައީ ޖޯރޭއެވެ. ނަމަވެސް އޭނާ ފެން މޯޓަރުގެ މައްސަލަ ހައްލަުކުރިއެވެ. ޖޯރޭ މޮޅީ ފޮޓޯނަގަން އެކަންޏެއް ނޫނެވެ.
ޖޯރޭގެ ހަޔާތުގެ ހިތާމަވެރި ހާދިސާއެއްގެ ގޮތުގައި އޭނާ ހިއްސާކުރީ، ކުޑައިރު އެއްލޮލަށް ދިމާވި މައްސަލައެކެވެ. އެނާ ބުނިގޮތުގައި އޭނާ ވިހެއިރު އެނާގެ ދެ ލޯވެސް ހުރީ ގަދަވެ ސަލާމަތުންކަމަށެވެ. އޭނާ ބުނިގޮތުގައި، ނުކުޅެދޭ މީހަކަށް އޭނާވީ، އޭނާއާ ނުވެސް ނުގުޅޭ ކަމެއްގައި ބަޔަކު ކުރި އަނިޔާއެއްގެ ސަބަބުންނެވެ. އެއީ އޭނާގެ އުމުރުން ސާދަ ފަނަރަ އަހަރުގައި ދިމާވިކަމެއްކަމަށް އެނާ ބުނެއެވެ މި ހާދިސާއިން ވެސް ދޭހަވަނީ، އޭރުގެ ރާއްޖޭގެ ހާލަތު އޮތް ގޮތެވެ. އެއީ މީގެ 45 ވަރަކަށް އަހަރު ކުރީގެ ވާހަކައެކެވެ. ނުދަންނަ މީހުންނަށް އަނިޔާކޮށް މަގުމަތީގައި "ކޯޓު" ހައިދައިގެން ހަމަ އުޅެނީޢެވެ.
ޖޯރޭގެ މަރުވުމާއި ގުޅިގެން ބައެއް މީހުން އޭނާ މަރުވި ގޮތާމެދު ސުވާލު އުފައްދައެވެ. އެއީ މަރުވެގެން އޮޔާ ދާތީ ފެނުމުންނެވެ.
މި ސުވާލުތައް މިހެން އަންނަނީ ޖޯރޭ ވެސް ކިޔައިދިން ފަދައިން، މީގެ 45 ވަރަކަށް އަހަރުކުރިން ވެސް ދިވެހި މުޖުތަމުގައި އޮތް "ބިރުވެރިކަން" އަދިވެސް އެބައޮތެވެ. އެކަނި ތަންތަނުގައި ހުއްޓައި މަރާލުމާ، އަނިޔާ ދިނުމާ، ނުގުޅޭ ކަންކަމުގައި މީހުންނަށް އަނިޔާ ދިނުންވެސް އަދިވެސް ނުހުއްޓެެވެ.
ބައެއް މީހުން ބުނާގޮތުގައި، ޖޯރޭއަކީ މޮޅު ނޫސްވެރިއެއްކަމުން، އޭނާއަށް ބަޔަކު ގޯނާކޮށްފައި އޮތުމަކީވެސް ވެދާނެކަމެކެވެ. ނަމަވެސް، ފުލުހުން މައުލޫމާތު ދީފައިވާ ގޮތުގައި، ޖޯރޭ އެންމެ ފަހުން ފެނިފައިވަނީ މަސްބާނަން ދަނިކޮށެވެ. އޭނާގެ ހަށިގަނޑު ފެނުނީ މާލޭ އުސްފަސްގަނޑާ ދިމާލުން، މަރުވެ އޮޔާދަނިކޮށެވެ.
ޖޯރޭ މަރުވުމަކީ ދިވެހި ނޫސްވެރިކަމަށް ލިބުނު ބޮޑު ގެއްލުމެކެވެ. އޭނާގެ ފަންނުވެރިކަމާއި ހިތްވަރުގަދަކަން އަބަދުވެސް ހަނދާންކުރެވޭނެއެވެ. ޖޯރޭގެ ފުރާނައަށް ސުވަރުގޭގެ ދާއިމީ ނިއުމަތް ލެއްވުން އެދި ދުއާ ދަންނަވަމެވެ. އާމީން!
