މަރުކަޒީ ބޭންކު، އެމްއެމްއޭއިން ފަތުރުވެރިންނަށް ހިދުމަތްދޭ ތަންތަނުން ޑޮލަރު މާރުކުރުމާ ގުޅޭ ގޮތުން ގެނައި އައު ގަވާއިދާ ގުޅިގެން ނަފާ ނަސީމް ވިދާޅުވެފައިވަނީ ޑޮލަރުގެ ކަޅު ބާޒާރަކީ ބައެއް މަހުޖަނުންނަށް ރަންވަޅެއް ކަމަށެވެ.
މި އައު ގަވާއިދުގެ ދަށުން، ޓޫރިސްޓް ރިސޯޓުތަކުން ކޮންމެ ފަތުރުވެރިއަކަށް 500 ޑޮލަރުގެ ރޭޓުން، އަދި ކުދި ހޮޓާތަކުން 25 ޑޮލަރުގެ ރޭޓުން ބޭންކަކުން ޑޮލަރު މާރުކުރަން ޖެހޭނެއެވެ. މި ނިންމުމާ ގުޅިގެން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ވަނީ ނުރުހުން ފާޅުކޮށްފައެވެ.
މި މައްސަލައިގައި ނަފާ ނަސީމްގެ ބަސް އަމާޒުވެފައިވަނީ ބައެއް ވިޔަފާރިވެރިންނަށެވެ. އޭނާ ވިދާޅުވެފައިވަނީ ރައްޔިތުންނަށް އޮޅުވާލުމަށްޓަކައި މި ގަވާއިދަކީ ވަރަށް ބޮޑު ގެއްލުމެއް ކަމަށް ބުނާ ބުނުމަކީ ރަނގަޅު ކަމެއް ނޫން ކަމަށެވެ.
ނަފާ ނަސީމް ވަނީ މީގެ ކުރިންވެސް ޑޮލަރުގެ ވަގު ވިޔަފާރިއާއި ބާޒާރާއި ގުޅޭގޮތުން ވާހަކަ ދައްކަވާފައެވެ. އޭނާ ޖުލައި މަހު ވިދާޅުވެފައިވަނީ ޑޮލަރުގެ އަގު ހެޔޮނުކުރެވެނީ "ވެރިން ވިޔަފާރިވެރިންނަށް ދަރަނިވެރިވެފަ" ތިބޭތީކަމަށެވެ.
"ސީއެންއެމް" އާ ވާހަކަ ދައްކަމަނުން ނަސީމް އޭރު ވިދާޅުވެފައިވަނީ ދިވެހި ސިޔާސީ ވެރިން ކެމްޕެއިންގެ ހަރަދުތަކަށް ވިޔަފާރި ވެރިން އަތުން ލާރީ ނަގާ ނެގުމުގެ ސަބަބުން ދަރަނި ވެރިވެ، އެވިޔަފާރި ވެރިންނަށް ގެއްލުން ވާ ގޮތަށް ގާނޫނާ ގަވާއިދު ބަދަލު ނުކުރެވޭ ކަމަށެވެ.
މިކަން ބަދަލުވެގެން ނޫނީ ޕޮލިސީ ލެވެލް ގަ ބަދަލެއް ނުގެނޭނެ ކަމަށްވެސް އޭނަ ބުންޏެވެ.
ޑޮލަރުގެ އަގު ކުރިން ނުވާހާ ބޮޑުވެގެން ދިޔުމާ ގުޅިގެން މިވަނީ ރާއްޖޭގެ ވިޔަފާރިތަކާ އިގްތިސާދަށް ބުރުއަރާފަ އެވެ. މިކަންކަން ހައްލު ކުރެވިގެން ނޫނީ އިގްތިސާދު ރަނގަޅު ކުރެވޭކަށް ނެތެވެ.
ކަޅު ބާޒާރުގައި އެމެރިކާ ޑޮލަރެއްގެ އަގު މިހާރު ވަނީ 18ރ. ފަހަނަޅައި ގޮސް 18.25ރ. އަށް އުފުލިއްފަ އެވެ.
