މިނިސްޓަރު މިހެން ވިދާޅުވީ ފަހިކޮށްދީފައިވާ ސްކޮލަޝިޕްގެ ފުރުސަތުގައި މިހާތަނަށް ހޮވުނު 14 ދަރިވަރުންގެ ތެރެއިން ފުރުމަށް ތައްޔާރުވެފައިވާ 11 ދަރިވަރުންނަށް ބޭއްވި ހާއްސަ ހަފްލާގައި ދެއްކެވި ވާހަކަފުޅުގައެވެ.
ހަމައެކަނި އަބަދު ފޮތް ކިޔުމުގެ އިތުރުން ކިޔެވުމުގައި މޮޅު ނަތީޖާ ނެރެވޭނީ ތިމާގެ ގެ ޖިސްމާއި، ނަފްސަށް ފައިދާހުރި ކަންކަމުގައިވެސް ޝާމިލްވެގެންކަމަށް އެ ހަފްލާގައި މިނިސްޓަރު މާރިޔާ ވިދާޅުވިއެވެ.
މާރިޔާ ވިދާޅުވީ ފުރިހަމަ ތައުލީމަކީ ހަމައެކަނި ފޮތުން ހޯދޭނެ އެއްޗެއް ނޫންކަމަށާއި އުޅޭމާހައުލާއި، ކުރެވޭ އާ ތަޖްރިބާތަކުން ތިމާގެ ރޫހަށާއި ޖިސްމަށް ލިއްބައިދޭ ހަމަޖެހުން ޝާމިލްވެގެން ހޯދޭނެ އެއްޗެއްކަމަށެވެ.
އެގޮތުން ހަމައެކަނި ފޮތްކިއުމުގެ އިތުރުން އިތުރު ހަރަކާތްތަކަށްވެސް ވަގުތު ހޭދަކުރަން ޖެހޭކަމަށް މިނިސްޓަރު ވިދާޅުވިއެވެ. އެގޮތަށް ކަންކޮށްފިނަަމަ ކިޔަވައިނިމި ހިދުމަތަށް ނުކުންނައިރު މީހާ އަކީ ހުރިހާގޮތަކުން ގާބިލްކަން އިތުރުވެފައިވާނެ މީހަކަށް ވެގެންދާނެކަމަށް މިނިސްޓަރު ވިދާޅުވިއެވެ.
ތިމާގެ ޖިސްމާއި ރޫހަށް ފައިދާކުރަނިވި ކަންކަމުގައި ވަގުތު ބަހާލަން ޖެހޭކަމަށާއި ފިޒިކަލް އަދި މެންޓަލް އެކްޓިވިޓީއަށް ވަގުތު ދޭންވާނެކަމަށް މާރިޔާ ވިދާޅުވިއެވެ. އެގޮތަށް އުޅެފިނަމަ ގިނަ އިލްމާއި ހުނަރު އުނގެނިވަޑައިގަތުމަށް މަގު ފަހިވެދާނެކަމުގައި ދެކިލައްވާކަމަށް އެކަމަނާ ވިދާޅުވިއެވެ.
މިނިސްޓަރުގެ ވާހަކަފުޅުގައި އިތުރަށް ވިދާޅުވީ ކިޔެވުމުގައި އެ ކުއްޖަކު ދިރިއުޅޭ މާހައުލެއްގައި ހުންނަ ރަގަޅު ފައިދާހުރިކަންކަން، ލިބޭ އިތުރު ވަގުތުތަކުގައި އުގެނި ދަސްކުރުމަކީ ކުރިމަގުގައި ފައިދާކުރާނެ ކަންކަން ކަމަށްވާއިރު، އެގައުމުގެ މުއްސަދި ސަގާފަތުން ކަންކަން ދަސްކޮށް ގުޅުންތައް ބަދަހި ކުރުމަކީވެސް މުހިންމުކަމެއްކަމަށް މާރިޔާ ވިދާޅުވިއެވެ.
އެގޮތަށް ކަންކަން ބައްޓަން ކުރާއިރު އަބަދުވެސް ތިމާމެންގެ ދީނާއި ސަގާފަތް ހަނދާން ނައްތައިލައިގެން ނުވާނެކަމަށާ، އޭގެ އިތުރަށްވެސް އެފަދަ އެހެންކަންކަމަށް ސަމާލުކަން ދެއްވައިގެން، އަރުތަ ހާސިލުކުރައްވާ ރާއްޖޭގެ ތަރައްގީއަށް ހިދުމަތް ކުރެއްވުމަށް ބޭނުންވާ ގާބިލުކަމާއި ހުނަރު ހޯއްދަވައިގެން އެނބުރި ގައުމީ ހިދުމަތަށް ނިކުމެ ވަޑައިގެންނެވުމަށް މާރިޔާ އިލްތިމާސް ކުރެއްވިއެވެ.
