ދިރާސީ އަހަރުގެ ފުރަތަމަ ޓާމުގެ ކިޔެވުމަށް ފަހު ސްކޫލުތަކުގެ ޗުއްޓީ ފެށުނީ މިދިޔަ ސެޕްޓެމްބަރު މަހުގެ 26ވަނަ ދުވަހު އެވެ.
ސްކޫލުތަކުގެ ދެވަނަ ޓާމުގެ ކިޔެވުން މިއަދު ފެށިއިރު މި ޓާމުގެ ކިޔެވުން ނިމޭނީ އަންނަ އަހަރުގެ މާރިޗު މަހުގެ ހަވަނަ ދުވަހު އެވެ.
ސްކޫލުތަކުގައި ކިޔެވުން މިއަދު ފަށާފައިވާއިރު ސްކޫލުތަކުގައި މިއަދު އަންނަނީ ޓީޗަރުންގެ ދުވަސް ފާހަގަކުރަމުންނެވެ.
ބައިނަލްއަގުވާމީ ޓީޗަރުންގެ ދުވަހުގެ ގޮތުގައި ހަމަ ޖައްސާފައިވާ ދުވަހަކީ ކޮންމެ އަހަރަކުވެސް އޮކްޓޫބަރު މަހުގެ ފަސްވަނަ ދުވަހެވެ. ނަމަވެސް ރާއްޖޭގެ ސްކޫލުތަކުގައި މި އަހަރުގެ ޓީޗަރުންގެ ދުވަސް ފާހަގަ ކުރަމުން އަންނަނީ މިއަދު އެވެ. އެއީ އިއްޔެ އަކީ ބަންދު ދުވަހަކަށް ވާތީ އެވެ.
މި އަހަރުގެ ދިރާސީ އަހަރުގެ ކިޔެވުން 96000 ދަރިވަރުންނާއި އެކު ފެށިއިރު، އޭތެރޭގައި ސަރުކާރުގެ 217 ސްކޫލުން 83000 އެއްހާ ދަރިވަރުން އަދި ޕްރައިވެޓް ސްކޫލުތަކުގައި 13000 ދަރިވަރުން އަންނަނީ ތައުލީމު ހާސިލްކުރަމުންނެވެ.
ތައުލީމާއި ބެހޭ ވުޒާރާއިން ހާމަކުރި ގޮތުގައި މިއަހަރު މާލޭގެ އެކި ސްކޫލުތަކަށް އަލަށް ވަތް ކުދިންގެ އަދަދު 1126 އަށް އަރެއެވެ.
