ޔޫގާންޑާ އިންޓަނޭޝަނަލް ސީރީސް ބެޑްމިންޓަން މުބާރާތުގެ އަންހެން ޑަބަލްސް އިން ރާއްޖޭގެ ރިވައިވަލް ސްޕޯޓްސް ކްލަބްގެ ނަބާ އާއި ނަބީގެ ޕެއާ ލޯ ހޯދީ، ކުއާޓާ ފައިނަލުން މޮޅުވެ، ސެމީ ފައިނަލުގައި ވާދަކޮށްގެނެވެ. ސެމީ ފައިނަލުގައި ޔޫއޭއީގެ ނިދީ ދޭސާއި އާއި ސްރީޔުތުކާ ސްރީޖިތު ޕަރޯލްގެ ޕެއާ އަތުން ބަލިވީ، ދެ ސެޓު އެއް ސެޓުންނެވެ. މެޗުގެ ސެޓުތައް ދިޔައީ، 21-14، 15-21 އަދި 21-18 އިންނެވެ.
ނަބީ އާއި ނަބާ އަކީ ބައިނަލްއަގުވާމީ މުބާރާތްތަކުގައި ރާއްޖޭން އެންމެ ކާމިޔާބު ޕެއާ އެވެ. މިހާތަނަށް، އެ ޕެއާ އިން ވަނީ އިންޓަނޭޝަނަލް މުބާރާތްތަކުގެ ޑަބަލްސް އިވެންޓުން، ދެ ރަން މެޑަލާއި، ތިން ރިހި މެޑަލް އަދި ފަސް ލޯ މެޑަލް ހޯދައިފަ އެވެ.
މިއީ، ނަބާ އާއި ނަބީ، ރިވައިވަލްއާ އެކު ޕެއާއެއްގެ ގޮތުގައި ކުޅުނު ފުރަތަމަ މުބާރާތެވެ. ރިވައިވަލް އިން ޔޫގާންޑާ މުބާރާތުގެ ހަތަރު އިވެންޓެއްގެ ކުއާޓާ ފައިނަލުގައި ކުޅެފަ އެވެ. އެ ގޮތުން، އަންހެން ސިންގަލްސްގައި ނަބާ އާއި ނަބީގެ އިތުރުން، ފިރިހެން ޑަބަލްސްގައި ޒަޔާން ޒަކީ އާއި ނިބާލް އަހުމަދުގެ ޕެއާ ވާދަކުރިއިރު، މިކްސް ޑަބަލްސްގެ ކުއާޓާ ފައިނަލުގައި ޒަޔާން އާއި ނަބާގެ ޕެއާ ވާދަކުރި އެވެ.
