އިލެކްޓްރިކް ވެހިކަލްތައް ޗާޖުކުރެވޭ ގޮތަށް ގާއިމުކުރަން ނިންމާފައިވާ ވެހިކަލް ޗާޖިން ސްޓޭޝަންގެ ހިދުމަތް ވަރަށް އަވަހަށް ފަށާނެ ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ އިއުލާންކުރެއްވީ މިދިޔަ އޮގަސްޓް މަހުގެ 25 ވަނދުވަހުއެވެ.
މި ސްޓޭޝަންތައް ގާއިމުކުރަނީ ސްޓެލްކޯ ހެޑް އޮފީހާއި އިންވެގެން އޮންނަ ދޮންއަދަރާދަ މަގުގައެވެ.
ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ މިއަދި އެކްސްގައި ކުރެެއްވި ޕޯސްޓެއްގައި ވިދާޅުވީ އިލެކްޓްރިކް ވެހިކަލް (އީވީ) ކާރު ޗާޖިން ސްޓޭޝަންގެ މަސައްކަތް ވަރަށް ބާރަށް ކުރިއަށްދާކަމަށާއި މިކަމުގެ އަމަލީ މަސައްކަތްވެސް ކުރަމުން އަންނަކަމަށެވެ.
ފަހުމީ ވިދާޅުވީ އީވީ ބޭނުންކުރާ ފަރާތްތަކަށް ސާފު ހަކަތަ ފަސޭހައިން ލިބޭނެ މަގު ފަހިކޮށްދީ، ތިމާވެއްޓާ ރައްޓެހި ހައްލުތަކަށް ގައުމު ބަދަލުވުމުގައި މި ޗާޖިން ސްޓޭޝަން މުހިންމު ދައުރެއް އަދާކުރާނެކަމަށެވެ. އަދި މި މަޝްރޫއުގެ މަސައްކަތް ތާވަލާއި އެއްގޮތަށް ނިންމާލުމަށް ވަރަށް ބުރަކޮށް ސްޓެލްކޯގެ މުވައްޒަފުން މަސައްކަތް ކުރަމުން ގެންދާކަމަށެވެ.
އިލެކްޓްރިކް ވެހިކަލްތައް ޗާޖުކުރެވޭ ސްޓޭޝަންތައް ހެދުމަކީ ރައީސް ޑރ. މުހައްމަދު މުއިއްޒު ގެންގުޅުއްވާ ތިމާވެށީގެ ހަރުދަނާ ސިޔާސަތުތަކުގެ ތެރެއިން ކާބަން ފުޓް ޕްރިންޓް ކުޑަކުރުމަށާއި، ގައުމަށާއި ދުނިޔެއަށް އަންނަ ކުރިއެރުންތަކާއިއެކު، ތިމާވެއްޓާއި ރައްޓެހި އުޅަނދުތަކަށް އޮންނަ ޑިމާންޑްބޮޑުވެ، އެފަދަ އުޅަނދުތައް ގެންގުޅެން ބޭނުންވާ ފަރާތްތަކަށާއި، އަދި މިހާރުވެސް ގެންގުޅޭ ފަރާތްތަކަށް ލުއި ފަސޭހަތައް ހޯދައިދިނުމަށް ކުރާ މަސައްކަތެއްކަމަށް ސްޓެލްކޯއިން ވަނީ ބުނެފައެވެ.
