ނޮކްއައުޓް ބުރުގެ ގުރު މިހާރު ނަގާފައިވާއިރު، ކްލަބް މޯލްޑިވްސް ކަޕްގެ އެންމެ ފަހުގެ ޗެމްޕިއަން، ކްލަބް ވެމްކޯ އާއި މުބާރާތުގެ އެންމެ ކާމިޔާބު ޓީމު، އެސްޓީއޯ ރެކްރިއޭޝަން ކްލަބް ކުޅެން ޖެހެއެވެ. މާނައަކީ ދެވަނަ ބުރާއެކު މި ދެ ޓީމުން ކުރެ އެއް ޓީމު މުބާރާތުން ވަކިވާނެއެވެ. ހަތަރު ފަހަރު ޗެމްޕިއަންކަން ހޯދާފައިވާ އެސްޓީއޯ އަކީ މި ފަހަރުގެ މުބާރާތުގައި ގްރޫޕް ސްޓޭޖުގައި ކުޅުނު ހުރިހާ މެޗަކުން މޮޅުވެގެން، އައި ޓީމެކެވެ. ވެމްކޯ އިން މި ފަހަރުގެ މުބާރާތުގައި ގްރޫޕް ސްޓޭޖުގައި އެމްޕީއެލް އަތުން ބަލިވުމުން، ގްރޫޕް ނިންމާލަން ޖެހުނީ ދެ ވަނައިގަ އެވެ. އެސްޓީއޯއާ ދެކޮޅަށް ވެމްކޯ ކުޅެން ޖެހުނީ ވެސް ދަށް ޕޮޓަކަށް ދިއުމުންނެވެ.
ދެވަނަ ބުރުގައި އެމްއޭސީއެލް އިން ނުކުންނާނީ އެޗްޑީސީއާ ދެކޮޅަށެވެ. އިމިގްރޭޝަން އިން ނުކުންނަން ޖެހޭނީ ސްޓެލްކޯ ރެކްރިއޭޝަން ކްލަބާ ދެކޮޅަށެވެ. އެފްއެސްއެމް ކުޅޭނީ މޯލްޑިވިއަންއާއެވެ. ބީއެމްއެލް ކުޅޭނީ ދިރާގާއެވެ. އަދި އާރްއާރްސީ އާއި ކްލަބް ޓީޓީއެސް ކުޅޭ އިރު، އެމްޕީއެލް ކުޅޭނީ ކްލަބް ފެނާއެވެ. ދިވެހި ސިފައިންގެ ކްލަބުން ކުޅޭނީ ޕްރިޒަން ކްލަބާ އެވެ.
ގަދަ 16 ބުރުގެ މެޗުތައް ކުޅޭނީ ހޯމަ ދުވަހުގެރެޔާއި އަންގާރަ ދުވަހުގެ ރޭގަ އެވެ.
