މި ސުވާލު މާރިޔާ އުފެއްދެވީ ރައީސް މުޢިއްޒު އިންޑިއާގެ ރަސްމީ ދަތުރެއްގައި ވަޑައިގެން ހުންނަވަނިކޮށެވެ. މާރިޔާ އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ރާއްޖޭގެ ކުރީގެ ވެރިން އާންމުކޮށް އެންމެ ފުރަތަމަ ރަސްމީ ދަތުރު ކުރައްވަނީ އިންޑިއާއަށް ކަމަށެވެ. ނަމަވެސް ރައީސް މުޢިއްޒު މި އާދަކާދައާ ހިލާފަށް އެންމެ ފުރަތަމަ ވަޑައިގެންނެވީ ޗައިނާއަށް ކަމަށް މާރިޔާ ފާހަގަކުރެއްވިއެވެ. އޭރު "އިންޑިއާ އައުޓް" ކެމްޕޭނުގެ ސިއާރެއްގެ ގޮތުގައި މިކަން ބޭނުންކުރެއްވި ކަމަށްވެސް މާރިޔާ ވިދާޅުވިއެވެ.
ވެރިކަމަށް 10 މަސް ފުރުމަށްފަހު ރައީސް މުޢިއްޒު މިހާރު އިންޑިއާގެ ރަސްމީ ދަތުރެއްގައި ވަޑައިގެން ހުންނެވުމާ ގުޅިގެން، މާރިޔާ ސުވާލު އުފައްދަވާފައިވަނީ ރައީސް މުއިއްޒު "އިންޑިއާ ފަސްޓް" ސިޔާސަތު ނަގަހައްޓަވާނެތޯ؟ އެވެ. މިއީ ރައީސް މުއިއްޒުގެ ކެމްޕޭނުގައި ވިދާޅުވެފައިވާ ގޮތާ ހިލާފު ކަމެއްގެ ގޮތުގައި މާރިޔާ ފާހަގަކުރައްވާފައިވެއެވެ.
ރައީސް މުޢިއްޒު ކެމްޕޭނުގައި ވިދާޅުވެފައިވަނީ ވަކި ޤައުމަކަށް އިސްކަމެއް ނުދެއްވާނެ ކަމަށާއި، "މޯލްޑިވްސް ފަރސްޓް" ސިޔާސަތެއް ގެންގުޅުއްވާނެ ކަމަށެވެ. ނަމަވެސް މިހާރު އިންޑިއާއަށް ކުރައްވާ ދަތުރުފުޅާ ގުޅިގެން މާރިޔާ ވަނީ ރައީސް މުޢިއްޒުގެ ހާރިޖީ ސިޔާސަތާމެދު ސުވާލު އުފައްދަވާފައެވެ.
