މިހާރު ކުރައްވަމުން ގެންދަވާ އިންޑިއާގެ ރަސްމީ ދަތުރުފުޅުގައި ބޭއްވެވި ނޫސްވެރިންގެ ބައްދަލުވުމެއްގައި، ރައީސް މުއިއްޒު ވިދާޅުވީ، އިންޑިއާއަކީ ދިވެހިރާއްޖޭގެ އިޤްތިޞާދީ ކުރިއެރުމުގައި އެންމެ މުހިންމު އެއް ބައިވެރިޔާ ކަމަށެވެ. އަދި ދެ ޤައުމުގެ ދެމެދުގައި އެފްޓީއޭއެއް ވުޖޫދަށް އައުމުން ރާއްޖޭގެ އިގްތިސާދަށް ވަރަށް ބޮޑެތި ފައިދާތަކެއް ކުރާނެ ކަމަށް އެމަނިކުފާނު ފާހަގަކުރެއްވިއެވެ. މި އެގްރީމަންޓުގެ މަޝްވަރާތައް ވީ އެންމެ އަވަހަކަށް ނިންމައި، ސޮއިކުރެވޭނެ ކަމަށް އުއްމީދުކުރައްވާ ކަމަށްވެސް ރައީސް ވިދާޅުވިއެވެ.
އިންޑިއާއަކީ ރާއްޖޭގެ ފަތުރުވެރިކަމުގެ ދާއިރާގެ އެންމެ މުހިންމު އެއް މާކެޓް ކަމަށްވެސް ރައީސް ފާހަގަކުރެއްވިއެވެ. އަދި އިތުރު އިންޑިއާ ފަތުރުވެރިން ރާއްޖެއަށް ޒިޔާރަތްކުރުމަށް ދަޢުވަތު ދެއްވިއެވެ. މީގެ އިތުރުން، އިންޑިއާއިން ރާއްޖެއަށް ދެއްވާފައިވާ އެކި ލޯނުތަކާއި އެހީތަކަށް ޝުކުރު އަދާކުރެއްވިއެވެ.
ރައީސް މުއިއްޒު އިތުރަށް ވިދާޅުވީ، ކުރިއަށް އޮތް ތަނުގައިވެސް ދެ ޤައުމުގެ ގުޅުން އިތުރަށް ބަދަހިކުރުމަށް މަސައްކަތްކުރައްވާނެ ކަމަށެވެ. އަދި މި އަހަރަކީ ދިވެހިރާއްޖެއާއި އިންޑިއާއާ ދެމެދު ސިޔާސީ ގުޅުން ޤާއިމުކުރިތާ 60 އަހަރު ފުރޭ އަހަރު ކަމަށްވާތީ، މި މުނާސަބަތު ފާހަގަކުރުމަށް ބޭއްވޭ ހާއްސަ ރަސްމިއްޔާތުތަކަށް އިންޑިއާގެ ބޮޑުވަޒީރު ނަރެންދްރަ މޯދީއަށް ދަޢުވަތު އެރުވިކަންވެސް ރައީސް ހާމަކުރެއްވިއެވެ.
