މިނިވަން ޗެމްޕިއަންޝިޕްގެ ޗެމްޕިއަންކަންވެސް ހޯދާފައިވާ އޭދަފުށްޓަކީ، މުސްތަގްބަލްގެ ޕްރެމިއަރ ލީގް ކްލަބެއް ކަމަށްވާނެ ކަމަށް، އެފްއޭއެމްގެ ޖެނެރަލް ސެކެއްޓްރީކަންވެސް ކުރައްވާފައިވާ ހާމިދު ފޯކާސްޓް ކުރެއްވީ، ރާއްޖޭގެ ފުޓްބޯޅައިގެ ހާލަތާ މެދު ސިލްސިލާކޮށް ލިޔުއްވާ ރިޕޯޓްތަކުގެ ތެރެއިން އެންމެ ފަހުން ލިޔުއްވި ރިޕޯޓްގައެވެ.
ކުޅިވަރު ހިންގުމުގެ ދާއިރާ އިން މަތީ ތައުލީމު ހާސިލް ކުރައްވައި އަދި އެ ދާއިރާއިން އަމަލީ ގޮތުން އެތައް ތަޖުރިބާތަކެއް ހޯއްދަވައިގެން ހުންނެވި ހާމިދު ވިދާޅުވީ ޒޯން ކްލަބްތަކަށް ދިރުން ނުލިބި އޮތީ ވާދަކުރާނެ ހަމަހަމަ ނިޒާމެއް ނެތުމުން ކަމަށެވެ. ލާމަރުކަޒު، ހޯމްއެންޑްއަވޭ ދިވެހި ޕްރެމިއްރލީގަކީ މިފަދަ ޕްލެޓްފޯމެއް ކަމަށް ވިދާޅުވެ ހާމިދު ނެންގެވި މިސާލަކީ، އޭދަފުށްޓެވެ.
ހާމިދު ވިދާޅުވި ގޮތުގައި ޒޯން ތަކަށް ބަލާލުމުން ފެންނަނީ އުއްމީދުން ފުރިފައިވާ ކުޅުންތެރިން ރާއްޖޭގެ ހުރިހާ ކަންކޮޅެއްގައި އުފެދިއްޖެކަމެވެ. ހިތާމަޔަކީ އެކުޅުންތެރިންގެ އުއްމީދު ހަގީގަތަކަށް ހަދަން މާލެއަންނަން މަޖުބޫރުވާކަމާއި މާލެ އައިސް ހުންނާނެ ގޮތެއް ހޯދާ، ކްލަބުން މުސާރަނުދެވޭނަމަ، ވަޒީފާއެއްވެސް ހޯދައިގެން ކުޅެން ވަގުތު ހުސްކުރެވޭތޯ ބެލުން ކަމަށް ހާމިދު ވިދާޅުވިއެވެ. ހާމިދު ވިދާޅުވި ގޮތުގައި ކުޅުންތެރިން ނިކަމެތިވީ މާލެއަށް ލީގް ހަނިކުރީމައެވެ!
އަތޮޅުތަކަށް ނިސްބަތްވާ ފުޓްބޯޅަ ޓީމުތައް ބޭރުކުރުމަށް ފަހު ދިވެހި ޕްރިމިއަ ލީގު އަލުން ބައްޓަން ކުރީ 2020 ވަނަ އަހަރުއެވެ. ތިން އަހަރަށް ފަހު އަތޮޅުތަކުގެ ޓީމުތައް ދިވެހި ޕްރިމިއަ ލީގުން ބޭރުކުރަން ނިންމީ މިހާރު މުއްދަތު ހަމަވެފައިވާ، ބައްސާމް އަދީލް ޖަލީލްގެ އެކްސްކޯއިންނެވެ. އެ އެކްސްކޯއާއެކު ދިވެހި ފުޓްބޯޅަވަނީ އިނދަޖެހިފައެވެ. ޕްރިމިއަ ލީގުގައި އެންމެ ފަހުން ކުޅުނު އަތޮޅުތެރެއަށް ނިސްބަތްވާ ދެ ޓީމަކީ ފ. ނިލަންދޫ އަދި ށ. ފޯކައިދޫއެވެ.
ބ. އަތޮޅުގެ އޭދަފުށްޓަކީ ފުޓްބޯޅައިގެ ރޮނގުން ބަލާއިރު ގިނަ ކަންތައްތަކެއް ހާސިލްކޮށްފައިވާ ރަށެކެވެ. ގައުމީ ފެންވަރުގެ ގިނަ ކުޅުންތެރިންތަކެއް އުފައްދައި އަދިވެސް އެ މަސައްކަތުގައި ޝާމިލުވެ، އޮތް ރަށެކެވެ.
