އައިޓީޓީއެފް މުބާރާތް ކުރިއަށްދާނީ މިއަދުން ފެށިގެން ކަޒަކްސްތާންގެ އަސްތާނާގައެވެ. މިއީ 27 ވަނަ އިންޓަނޭޝަނަލް ޓޭބަލް ޓެނިސް ފެޑެރޭޝަން އޭޝިއަން ޗެމްޕިއަންޝިޕެވެ.
މި މުބާރާތުގައި ވާދަކުރާ ގައުމީ ޓީޓީ ޓީމުގައި ހަތަރު އަންހެން އެތްލީޓުން އަދި ހަތަރު ފިރިހެން އެތްލީޓުން ހިމެނެއެވެ. އަންހެން ސްކޮޑުގައި ހިމެނެނީ، ފާތިމަތު ދީމާ އަލީ، އައިޝަތު ރަފާ ނާޒިމް، މިޝްކާ މުހައްމަދު އިބްރާހިމް އަދި ލައިސާ ފަތުހުﷲ އިސްމާއިލް އެވެ.
ފިރިހެން ސްކޮޑުގައި ހިމެނެނީ، އަހްޔާރު އަހުމަދު ހާލިދުގެ އިތުރުން، މުންސިފް އަހުމަދު، މުހައްމަދު ޝައްފާން އިސްމާއިލް އަދި ޒީކް ހަސަން ލަތީފް އެވެ.
މި މުބާރާތުގައި ފިރިހެން 24 ޓީމާއި އަންހެން 20 ޓީމު ވާދަކުރެއެވެ. އަސްތާނާގެ ދައުލަތު ސްޕޯޓްސް ކޮމްޕްލެކްސްގައި ކުރިއަށްދާ އޭޝިއާގެ މި މުބާރާތަކީ އަންނަ އަހަރު ބާއްވާ ދުނިޔޭގެ ޓޭބަލް ޓެނިސް މުބާރާތުގެ ކޮލިފިކޭޝަން އިވެންޓެއްގެ ގޮތުގައި ކުރިއަށްދާ މުބާރާތެކެވެ.
