ކްލަބް މޯލްޑިވްސް ކަޕްގެ ކުއާޓާ ފައިނަލުން އެންމެ ފަހުގެ ޗެމްޕިއަން، ކްލަބް ވެމްކޯ ފުރުސަތު ހޯދީ ޓީމު އެސްޓީއޯ އަތުން ޕެނަލްޓީ ޖަހައިގެން 7-4 އިން މޮޅުވެގެންނެވެ. އެސްޓީއޯ އާއި ވެމްކޯ ބައްދަލުކުރި މެޗުގެ ފުރިހަމަ ވަގުތު ހަމަވިއިރު، ދެ ޓީމު އޮތީ 3-3 އިން އެއްވަރުވެފަ އެވެ. އެސްޓީއޯގެ ހުޒައިފަތު ރަޝީދު ހެޓްރިކެއް ހެދި މި މެޗުގައި، ވެމްކޯގެ ލަނޑުތައް ޖެހީ، އަލީ ޝިޔާހު، އިސްމާއިލް ވަޖީހު އަދި އިބްރާހިމް މަހުދީ (ފޭދޫ އިއްބެ) އެވެ. ޕެނަލްޓީގައި، އެސްޓީއޯގެ އިނާން އާއި ހުޒޭގެ ޕެނަލްޓީތައް ވެމްކޯގެ ކީޕަރު، އަބްދުﷲ ޒިމާމް މަތަކޮށް އެ ޓީމު މޮޅުކޮށްދިނީ އެވެ.
ދެވަނަ ބުރުގައި ރޭ ކުޅުނު އެހެން މެޗުތަކާއެކު ވެމްކޯގެ އިތުރުން، އެމްއޭސީއެލް، ސްޓެލްކޯ އަދި މޯލްޑިވިއަންވަނީ ކުއާޓާއަށް ދަތުރުކޮށްފައެވެ.
އެމްއޭސީއެލް އިން ވަނީ 1-1 އިން އެޗްޑީސީއާ އެއްވަރުކޮށް އަދި ޕެނަލްޓީގައި މޮޅުވެފައެވެ.
ސްޓެލްކޯ ކުއާޓާ އަށްދިޔައީ އިމިގްރޭޝަން ކޮޅަށް ހަ ލަނޑު ޖަހައި ބޮޑު ތަފާތަކުން މޮޅުވެގެންނެވެ. އަދި މޯލްޑިވިއަންވަނީ އެފްއެސްއެމް ބަލިކޮށްފައެވެ.
