މި ނިމިދިޔަ މަހުގެ ނިޔަލަށް ބޭނުންކުރެވޭ ރިޒާވުގައި ހުރީ އެންމެ 49 މިލިއަން ޑޮލަރެވެ. މިއީ އޮގަސްޓު މަހާ އަޅާބަލާއިރު 12 މިލިއަން ޑޮލަރު ދަށް އަދަދެކެވެ.
ގްރޮސް އިންޓަނޭޝަނަލް ރިޒާވަށް ބަލާއިރު، މި ނިމިދިޔަ މަހުގެ ނިޔަލަށް ހުރީ 322 މިލިއަން ޑޮލަރެވެ. މިއީ އޮގަސްޓު މަހާ އަޅާބަލާއިރު 72 މިލިއަން ޑޮލަރު ދަށް އަދަދެކެވެ. މި އަދަދަކީ ރާއްޖޭގެ އިމްޕޯޓު ބޭނުންތަކަށް ފުދޭވަރަށްވުރެ މާ ދަށް އަދަދެއްކަން ފާހަގަކުރެވެއެވެ.
ނަމަވެސް، މި ހާލަތު އަވަހަށް ރަނގަޅުވާނެކަމަށް އުއްމީދު ކުރެވެއެވެ. އެމްއެމްއޭ އިން ބުނާގޮތުގައި އިންޑިއާގެ ރިޒާވު ބޭންކާ އެކު 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީއެއްގައި ވަނީ ސޮއިކޮށްފައެވެ. މީގެ އިތުރުން، 30 ބިލިއަން އިންޑިއަން ރުޕީސްގެ ފެސިލިޓީއެއްގައިވެސް ވަނީ ސޮއިކޮށްފައެވެ. މި ފެސިލިޓީތަކުގެ ސަބަބުން ރިޒާވުގެ ހާލަތު ރަނގަޅުވެ، ރާއްޖެއާއި އިންޑިއާއާ ދެމެދު ކުރެވޭ ވިޔަފާރީގެ މުއާމަލާތްތައް ފަސޭހަވެގެންދާނެ ކަމަށް ބެލެވެއެވެ.
ރިޒާވުގެ ހާލަތު ދަށްވުމާ ގުޅިގެން، ބައިނަލްއަޤްވާމީ ރޭޓިންގ އޭޖެންސީތަކުން ވަނީ ރާއްޖޭގެ ސޮވަރިން ކްރެޑިޓު ރޭޓިންގ ދަށްކޮށްފައެވެ. މިކަމުގެ ސަބަބުން ރާއްޖެއިން އަދާކުރަންޖެހޭ ދަރަނި އަދާނުކުރެވުމުގެ މައްސަލަ އިތުރުވެފައިވާކަން ފާހަގަކުރެވެއެވެ.
