މި މައްސަލައިގައި ހައިކޯޓުގައި ކުރިއަށް ދިޔަ އަޑުއެހުމުގައި ޝާދިޔާގެ ދިފާއީ ވަކީލު، ނޫރުއްސަލާމް އަބޫބަކުރު، ވަނީ ފުލުހުންގެ އަމަލުތަކާމެދު ސުވާލު އުފައްދާފަ އެވެ.
ވަކީލު ނޫރުއްސަލާމް ފާހަގަ ކުރެއްވި ގޮތުގައި، އެމްބަސީތަކާ ކައިރިން އެއްވުމާ ގުޅޭގޮތުން ގާނޫނުގައި ވަކި އުސޫލުތަކެއް ބަޔާންކޮށްފައިވެ އެވެ. އެގޮތުން، އެމްބަސީތަކާ 50 ފޫޓުގެ ދުރުމިނެއްގައި އެއްވެވިދާނެ ކަމަށް ގާނޫނުގައި ބަޔާންކޮށްފައިވާއިރު، ފުލުހުން ވަކާލާތުކޮށްފައިވަނީ އެމްބަސީއަކާ ކައިރިން އެއްވެސް ގޮތަކަށް އެއްނުވެވޭނެ ކަމަށެވެ. މިއީ ސުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފު އަމަލެއް ކަމަށް ވަކީލު ވިދާޅުވި އެވެ.
މީގެ އިތުރުން، އެމްބަސީތަކާ ކައިރިން އެއްނުވުމަށް ޝަރުތުކޮށް ދޫކޮށްލުމަށް އެދުމުން ވެސް، އެކަމަށް ފުލުހުންނާއި މުއްދަތު ޖެހި ގާޒީ ރިއާޔަތް ކުރައްވާފައި ނުވާކަން ވަކީލު ފާހަގަ ކުރެއްވި އެވެ. އަދި ފުލުހުންގެ ވާޖިބަށް ހުރަސްއެޅި ކަމަށް ކުރާ ތުހުމަތަށް ބާރު ދޭ އެއްވެސް ހެއްކެއް ނެތްކަމާއި، ހަޑިހުތުރު ބަހުރުވަ ބޭނުން ކުރި ކަމަށް ކުރެވުނު ތުހުމަތާ ގުޅިގެން އެއްވެސް ސުވާލެއް ކޮށްފައިނުވާ ކަމަށްވެސް އޭނާ ފާހަގަ ކުރެއްވި އެވެ.
