މާލޭގެ ކްލަބްތަކަކީ އެއްވަނަ ޑިވިޒަން ކްލަބްތައް ކަމުގައި ބެލެވިފައިވަނީ "އޮޅިގެން ކަމަށް ގަބޫލު ކުރެއްވޭ ކަމަށް، އެފްއޭއެމްގެ ޖެނެރަލް ސެކެއްޓްރީކަންވެސް ކުރައްވާފައިވާ ހާމިދު ވިދާޅުވީ ރާއްޖޭގެ ފުޓްބޯޅައިގެ ހާލަތާ މެދު ސިލްސިލާކޮށް ލިޔުއްވާ ރިޕޯޓްތަކުގެ ތެރެއިން އެންމެ ފަހުން ލިޔުއްވި ރިޕޯޓްގައެވެ.
ހާމިދު ވިދާޅުވީ، ރާއްޖޭގެ އުތުރުން ދެކުނަށް އެތުރިފައިހުރި ޒޯންތަކަށް ބަލާލުމުން ފާހަގަކުރެވޭނެ އެއްކަމަކީ، މާލެ ސިޓީ އަކީ ޒޯން-9 ކަމުގައި ހަމަޖައްސާފައިވާކަން ކަމުގައެވެ. ހާމިދު ވިދާޅުވީ މި ތާރީހީ އެކްސިޑެންޓަކީ ހެދުނު ބޮޑު ގޯހެއްކަމުގައި ނޫނީ ނުވާނެ ކަމަށެވެ.
ހާމިދު ވިދާޅުވި ގޮތުގައި ޕްރެމިއަރ ލީގް އެންމެ ޒޯނަކަށް މަރުކަޒުކޮށްގެން ރާއްޖޭގައި ކުރި 16 އަހަރުގެ ތަޖްރިބާ މިއޮތީ ފެންނާށެވެ. އެކަމުން ލީގް ފޭލްވީ ކަމަށް، ކުރީގެ ސްޕޯޓްސް މިނިސްޓްރީގެ ސްޓޭޓް މިނިސްޓަރު ހާމިދު ވިދާޅުވިއެވެ.
އަތޮޅުތަކަށް ނިސްބަތްވާ ފުޓްބޯޅަ ޓީމުތައް ބޭރުކުރުމަށް ފަހު ދިވެހި ޕްރިމިއަ ލީގު އަލުން ބައްޓަން ކުރީ 2020 ވަނަ އަހަރުއެވެ. ތިން އަހަރަށް ފަހު އަތޮޅުތަކުގެ ޓީމުތައް ދިވެހި ޕްރިމިއަ ލީގުން ބޭރުކުރަން ނިންމީ މިހާރު މުއްދަތު ހަމަވެފައިވާ، ބައްސާމް އަދީލް ޖަލީލްގެ އެކްސްކޯއިންނެވެ. އެ އެކްސްކޯއާއެކު ދިވެހި ފުޓްބޯޅަވަނީ އިނދަޖެހިފައެވެ. ޕްރިމިއަ ލީގުގައި އެންމެ ފަހުން ކުޅުނު އަތޮޅުތެރެއަށް ނިސްބަތްވާ ދެ ޓީމަކީ ފ. ނިލަންދޫ އަދި ށ. ފޯކައިދޫއެވެ.
ހާމިދު ވިދާޅުވި ގޮތުގައި ޒޯން ތަކަށް ބަލާލުމުން ފެންނަނީ އުއްމީދުން ފުރިފައިވާ ކުޅުންތެރިން ރާއްޖޭގެ ހުރިހާ ކަންކޮޅެއްގައި އުފެދިއްޖެކަމެވެ. ހިތާމަޔަކީ އެކުޅުންތެރިންގެ އުއްމީދު ހަގީގަތަކަށް ހަދަން މާލެއަންނަން މަޖުބޫރުވާކަމާއި މާލެ އައިސް ހުންނާނެ ގޮތެއް ހޯދާ، ކްލަބުން މުސާރަނުދެވޭނަމަ، ވަޒީފާއެއްވެސް ހޯދައިގެން ކުޅެން ވަގުތު ހުސްކުރެވޭތޯ ބެލުން ކަމަށް ހާމިދު ވިދާޅުވިއެވެ. ހާމިދު ވިދާޅުވި ގޮތުގައި ކުޅުންތެރިން ނިކަމެތިވީ މާލެއަށް ލީގް ހަނިކުރީމައެވެ!
