މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނެރުނު އެންމެ ފަހުގެ ތަފާސްހިސާބުތަކުން ދައްކާގޮތުގައި، މި އަހަރުގެ ޖެނުއަރީ މަހުން ފެށިގެން އޯގަސްޓް މަހުގެ ނިޔަލަށް ރާއްޖެއިން އެކްސްޕޯޓްކުރި ކަނޑުމަހުގެ އުފެއްދުންތަކުގެ ޖުމްލަ އަގަކީ 59.5 މިލިއަން ޑޮލަރެވެ. މިއީ މިދިޔަ އަހަރުގެ މި މުއްދަތުގައި އެކްސްޕޯޓްކުރި 108.5 މިލިއަން ޑޮލަރާ އަޅާބަލާއިރު ވަރަށް ބޮޑު ދަށްވުމެކެވެ.
މި ދަށްވުމުގެ ސަބަބުން ރާއްޖޭގެ މުޅި އެކްސްޕޯޓަށްވެސް އަސަރުކޮށްފައިވެއެވެ. މި އަހަރުގެ ފުރަތަމަ 8 މަސްދުވަހު ރާއްޖެއިން އެކްސްޕޯޓްކުރި މުދަލުގެ ޖުމްލަ އަގު ވަނީ 266.5 މިލިއަން ޑޮލަރަށް ދަށްވެފައެވެ. މިދިޔަ އަހަރުގެ މި މުއްދަތުގައި މި އަދަދު ހުރީ 280 މިލިއަން ޑޮލަރުގައެވެ.
ނަމަވެސް، މަސްވެރިކަމުގެ ދާއިރާއަށް މިފަދަ ލޮޅުމެއް އައި ނަމަވެސް، ރާއްޖޭގެ ރީ-އެކްސްޕޯޓް ވަނީ އިތުރުވެފައެވެ. ހާއްސަކޮށް ޖެޓް ފިއުލް ވިއްކުން ވަނީ ފާހަގަކޮށްލެވޭ މިންވަރަކަށް އިތުރުވެފައެވެ. މި އަހަރުގެ ފުރަތަމަ 8 މަސްދުވަހު 146.9 މިލިއަން ޑޮލަރުގެ ޖެޓް ފިއުލް ވިއްކާފައިވާއިރު، މިދިޔަ އަހަރުގެ މި މުއްދަތުގައި ވިއްކާފައިވަނީ 124.2 މިލިއަން ޑޮލަރުގެ ޖެޓް ފިއުލްއެވެ.
