އިސްލާމިކް މިނިސްޓްރީން އޮފީސް އިމާރާތެއްގެ ގޮތުގައި މި އިމާރާތް އެޅުމަށް ހަމަޖެހިފައިވަނީ މާލޭގެ 64 ނަންބަރު ކޮށީގައި އެވެ.
މިނިސްޓްރީން މިއަދު އިއުލާންކޮށްފައިވަނީ ދާރުލް އަރުޤަމްގެ ކޮންސެޕްޓް ޑިޒައިން، ޑްރޯވިންގްސް، ބީއޯކިޔުއާއި، ޓެކްނިކަލް ސްޕެސިފިކޭޝަން، މެޓީރިއަލް ސްޕެސިފިކޭޝަން އަދި ޓެންޑަ ޑޮކިއުމެންޓް ތައްޔާރުކޮށްދޭނެ ފަރާތެއް ހޯދާށެވެ.
މި ބީލަން ހުޅުވާލާފައިވަނީ ވިޔަފާރި ރަޖިސްޓްރީ ކުރުމުގެ ގާނޫނުގެ ދަށުން ވިޔަފާރި ރަޖިސްޓަރީ ކޮށްފައިވާ ކުދި އަދި މެދު ފަންތީގެ ވިޔަފާރިތަކަށެވެ.
މިނިސްޓްރީން ވަނީ އެކަމަށް ޝައުގުވެރިވާ ފަރާތްތަކުން އަންދާސީ ހިސާބު ހުށަހެޅުމަށް ރަޖިސްޓްރީ ކުރައްވާ، މަޢުލޫމާތު ސާފުކުރެއްވުމަށްފަހު މިނިސްޓްރީއަށް ވަޑައިގެން އަންދާސީ ހިސާބު ހުށަހެޅުއްވުން އެދިފައެވެ.
މިނިސްޓްރީން ބުނީ، ބީލަމުގައި ބައިވެރިވެލައްވަން އެދޭ ފަރާތްތަކުން މިމަހުގެ 14 ވާ ހޯމަ ދުވަހުގެ 14:00 ގެ ކުރިން މިލިންކު މެދުވެރިކޮށް ރަޖިސްޓްރީކުރައްވަން ޖެހޭނެ ކަމަށެވެ.
ވަގުފް އިމާރާތެއްގެ ގޮތުގައި މިވަގުތު ރާއްޖޭގައި ހުރި ހަމައެކަނި އިމާރާތަކީވެސް މާލޭގައި ހުރި އިމާރާތެކެވެ. އެއީ މަޖިީދީ މަގުގައި މާފަންނު މަދަރުސާ އާއި އިންވެގެން ހުރި "ދާރުލް އީމާން" އިމާރާތެވެ.
ރާއްޖޭގައި ބިނާކުރާ އެންމެ ބޮޑު ވަގުފް އިމާރާތް "ދާރުއްސަލާމް"ގެ ނަމުގައި ހުޅުމާލޭގައި އިމާރާތް ކުރުމަށްވެސް އިސްލާމިކް މިނިސްޓްރީން ވަނީ ނިންމާފަ އެވެ.
ރާއްޖޭގެ އެކި ސަރަހައްދުތަކުގައި ވަގުފް އިމާރާތްތަކެއް އެޅުމަށްޓަކައި ސިޓީ ވަގުފާއި އަތޮޅު ވަގުފް މަޝްރޫއެއްވެސް މިހާރު ވަނީ އިފްތިތާހްކޮށްފަ އެވެ.
