ދިވެހި އަންހެން ޓީޓީ ޓީމުން ލަންކާގެ މައްޗަށް ތާރީހީ މި ކާމިޔާބު ހޯދީ، ކަޒަކިސްތާނުގައި މިހާރު ކުރިއަށްދާ އޭޝިއަން ޗެމްޕިއަންޝިޕުގެ ގުރޫޕް ސްޓޭޖުގައެވެ. ލަންކާގެ މައްޗަށް ސީދާ ތިން ގޭމުން ހޯދި މޮޅަކީ، އަންހެން ޓީމު އިވެންޓުގައި ލަންކާގެ މައްޗަށް ރާއްޖޭން ހޯދި ފުރަތަމަ މޮޅުވެސްމެއެވެ.
އިންޖިވިޖުއަލް މެޗުތަކުގައި ދިވެހި ކުޅުންތެރިން މީގެ ކުރިން ލަންކާގެ ކުޅުންތެރިން އަތުން މޮޅުވި ނަމަވެސް ޓީމު އިވެންޓްތަކުގައި އަންހެން ޓީމަށް މިހާތަނަށް ލަންކާ ބަލި ނުކުރެވި އޮތް އޮތުން މިހާރު ނިމުނީއެވެ. ނޭޕާލްގައި ޑިސެމްބަރު 2019 ގައި ބޭއްވި ސައުތު އޭޝިއަން ގޭމްސްގެ ޓީޓީގެ އަންހެން ޓީމު އިވެންޓް ފައިނަލަށް ވެސް ރާއްޖެއަށް ނުދެވުނީ، ސެމީ ފައިނަލުގައި ލަންކާ އަތުން ބަލިވުމުންނެވެ.
ކަޒަކިސްތާނުގެ އަސްތާނާގައި ކުޅުނު މެޗުން ދިވެހި ޓީމު ކުރި ހޯދުން ވީ ތާރީހީ މޮޅަކަށެވެ. މެޗު ރާއްޖޭން ކާމިޔާބު ކުރީ ސީދާ ތިން ގޭމުންނެވެ. މެޗުގެ ފުރަތަމަ ގޭމްގައި ރާއްޖޭގެ އާއިޝަތު ރަފާ ނާޒިމު ވަނީ ލަންކާގެ ކްލައްޕްވަވަދޫ ލަސަންޔާއާ ދެކޮޅަށް ކުޅުނު ގޭމް ސީދާ ތިން ސެޓުން މޮޅުވެފަ އެވެ. އެ ގޭމްގެ ސެޓްތައް ރަފާ ގެންދިޔައީ 12-10، 11-8، 11-8 ންނެވެ.
ދެވަނަ ގޭމްގައި ރާއްޖޭގެ ފާތިމަތު ދީމާ އަލީ ވަނީ ލަންކާގެ ހަލަވަތަގެ ޝަމަލަޝާއާ ދެކޮޅަށް ކުޅުނު ގޭމް ވެސް ސީދާ ތިން ސެޓުން ގެންގޮސްފަ އެވެ. އެ ގޭމް ދީމާ ކާމިޔާބު ކުރީ 11-9، 11-9 އަދި 11-4 ންނެވެ.
މިޝްކާ މުހައްމަދު އިބްރާހިމް، އިއްޔެ ލަންކާއާ ދެކޮޅަށް ކުޅުނު މެޗުގެ ތިންވަނަ ގޭމަށް ނުކުމެ، މެޗު ރާއްޖެ އަށް ކާމިޔާބުކޮށް ދިނީ 3-1 ސެޓުންނެވެ. މިޝްކާ އެ ގޭމް ކާމިޔާބު ކުރީ 13-11، 11-7، 9-11 އަދި 11-2 ންނެވެ.
ރާއްޖޭގެ ވަކިވަކި ކުޅުންތެރިން، އިންޑަވިޖުއަލް އިވެންޓްތަކުގައި ލަންކާގެ މައްޗަށް ކުރި ހޯދަ އެވެ. މެއި މަހު ނޭޕާލްގައި ބޭއްވި ދެކުނު އޭޝިއާގެ އޮލިމްޕިކް ކޮލިފައިން މުބާރާތުން ރާއްޖޭގެ ފާތިމާތު ދީމާ އަލީ އެ ގޭމްސް އަށް ކޮލިފައިވީ ފައިނަލުގައި ލަންކާގެ އެއްވަނަ ކުޅުންތެރިޔާ ބިމަންދީ ބަންޑަރާ ބަލި ކުރުމަށް ފަހު އެވެ.
