މިއަދަކީ ދުނިޔޭގެ ފެންވަރުގައި ފާހަގަކުރާ ނަފްސާނީ ދުޅަހެޔޮކަމުގެ ދުވަހެވެ. މިއަދުގެ މުނާސަބަތުގައި ހަޔާ އެޑިއުކޭޝަން މިނިސްޓްރީނަ ވަނީ ހަރަކާތްތަކެއް ހިންގާފައެވެ. އެގޮތުން ދުވަސްފެށުމުގެ ގޮތުން ބޭއްވި ހަރަކާތުގައި މިނިސްޓަރު ވަނީ މުވައްޒަފުންނަށް މަސައްކަތުގެ މާހައުލާ ގުޅޭގޮތުން މެސެޖެއް ދެއްވާފައެވެ.
މިއަހަރުގެ ޝިއާރު ކަމުގައިވާ "މަސައްކަތުގެ މާހައުލުގައި ނަފްސާނީ ދުޅަހެޔޮކަން" އެއީ އެންމެންނަށްވެސް އަސަރުކުރާ ކަމެއްކަމަށް މިނިސްޓަރު މާރިޔާ ވިދާޅުވިއެވެ.
ޖިސްމާނީ ދުޅަހެޔޮކަމަށް ސަމާލުކަންދޭ ފަދައިން މިއަދަކީ ނަފްސާނީ ދުޅަހެޔޮކަމަށްވެސް ސަމާލުކަން ދޭންޖެހޭކަން ހަނދާންކޮށްދޭ ދުވަހެއްކަމަށް މިނިސްޓަރު މާރިޔާ ވިދާޅުވިއެވެ.
މިނިސްޓަރު ވިދާޅުވީ ފުރަތަމަ ކަމަކަށް، ތިމާ މީހާ އުޅޭގޮތާމެދު ހާމަކަންބޮޑު ގޮތެއްގައި ވާހަކަދެއްކޭ މާހައުލެއް އުފެއްދުން މުހިންމުކަމަށެވެ. އެގޮތުން އެންމެންނަށްވެސް ރަނގަޅު ދުވަސްތަކާއި ދެރަ ދުވަސްތައް އަންނާނެކަމަށާއި، އެފަދަ ދުވަހެއްގައި ތިމާގެ ނަފްސާނީ ހާލަތު ދެރަވެއްޖެނަމަ، އެކަން ބުނުމަކީ މައްސަލައެއް ނޫންކަމަށެވެ. އަދި ނަފްސާނީ ދުޅަހެޔޮކަމަށްޓަކައި ދުވަހެއް ބޭނުންވާނަމަ، އެދުވަސް ނެގުން މުހިންމުކަމެއްކަމަށްވެސް މިނިސްޓަރު ފާހަގަކުރެއްވިއެވެ.
މަސައްކަތުގެ މާހައުލުގައި އެކަކު އަނެކަކަށް އަޅާލުމަށް މިނިސްޓަރު ވަނީ މުވައްޒަފުންނަށް ހިތްވަރު ދެއްވާ، އިލްތިމާސްކުރައްވާފައެވެ. އަދި އެހެން މުވައްޒަފުންގެ ހާލު ބަލައި ކޮށްދެވޭ ކުޑަކުޑަ އަމަލަކުން އަނެކާއަށް ވަރަށް ބޮޑު ބަދަލެއް ގެނެސްދޭނެކަން އެކަމަނާ ފާހަގަކުރެއްވިއެވެ.
މިނިސްޓަރު އިތުރަށް މުވައްޒަފުންގެ ކިބައިން އެދިވަޑައިގަތީ މި މަސައްކަތުގެ މާހައުލަކީ އަޅުގަނޑުމެން ހަމައެކަނި ބުރަކޮށް މަސައްކަތްކުރާ ތަނެއްގެ ގޮތުގައި ނުދެކި އެކަކު އަނެކަކުގެ ދުޅަހެޔޮކަމަށް އެހީތެރިވާ ތަނެއްގެ ގޮތުގައި ބާއްވަން ބާރުއެޅުމަށެވެ.
