ރާއްޖެ އިސްލާމްވީ ދުވަހުގެ ގޮތުގައި ކޮންމެ އަހަރަކުވެސް ފާހަގަކުރަމުން އަންނަނީ ރަބީއުލްއާހިރާ މަހުގެ ދެވަނަ ދުވަހެވެ. މިއަހަރު ފާހަގަކުރީ ރާއްޖެ އިސްލާމްވިތާ 898 އަހަރު ފުރުނު ދުވަހެވެ. އެހެންކަމުން ރާއްޖެ އިސްލާމްވިތާ 900 އަހަރު ފުރޭނީ 2026 ވަނަ އަހަރުއެވެ.
އެ ވުޒާރާއިން ބުނީ ރާއްޖެ އިސްލާމްވިތާ 900 އަހަރު ފުރުން ފާހަގަކުރަން ހާއްސަ ގުނާނާ (ކައުންޓް ޑައުން) އެއް ފެށީ އެ ދުވަސް ވަރަށް ކުލަގަދަކޮށް ފާހަގަކުރަން ރައީސް ޑރ. މުއިއްޒު ނިންމެވުމުންކަމަށެވެ.
ރާއްޖެ އިސްލާމްވީ ހިޖުރައިން 548 ވަނަ އަހަރުގެ ރަބީއުލްއާހިރު މަހުއެވެ. އެދުވަސް ފާހަގަކުރަން ދިވެހި ދައުލަތުން ފުރަތަމަ ފެށީ ހިޖުރައިން 1374 ވަނަ އަހަރެވެ.
އެ އަހަރުން ފެށިގެން 1387 މި ދުވަސް ފާހަގަ ކުރެއްވުމަށްފަހު އޭގެ ފަހުން އެ ދުވަސް ފާހަގަކުރެއްވުން ހުއްޓާލިއެވެ. އެއީ 14 އަހަރު އެދުވަސް ފާހަގަކުރުމަށްފަހުއެވެ. ދެން އަލުން އަނެއްކާވެސް ރާއްޖެ އިސްލާމްވީ ދުވަސް ފާހަގަކުރަން ފެށީ 1421 ވަނަ އަހަރުއެވެ. އޭގެ ފަހުން މިދުވަސް އަންނަނީ ކޮންމެ އަހަރަކުވެސް ފާހަގަކުރަމުންނެވެ.
