ދައުލަތުގެ މީޑިއާ މެދުވެރިކުރައްވައި ވާހަކަ ދައްކަވަމުން މިނިސްޓަރު ހަލީލް ވިދާޅުވީ ރައީސުލްޖުމްހޫރިއްޔާގެ މި ދަތުރުފުޅުގައި ކުރެވުނު އެއްވެސް މަސައްކަތެއްގައި ރައްޔިތުންނަށް ފޮރުވާނެ އެއްޗެއް ނޯންނާނެ ކަމަށެވެ.
މިނިސްޓަރު ހަލީލް އިތުރަށް ވިދާޅުވީ މިއީ ރައްޔިތުންގެ އިތުބާރު އަލުން ހޯދުމަށް ރައީސް އެޅުއްވި ހަރުދަނާ ފިޔަވަޅެއް ކަމަށެވެ. އޭނާ ވިދާޅުވި ގޮތުގައި މީގެ ކުރިން ކަންކަން ފޮރުވުމުގެ ސަބަބުން ގެއްލިފައިވާ އިތުބާރު އަނބުރާ ގެނައުމަށް މިއީ މުހިންމު ފިޔަވަޅެކެވެ. އަދި މިކަމުން ދޭހަވަނީ ހާރިޖީ ސިޔާސަތުގެ ތެރޭގައި ނުކިއްސަރު ކަންތައްތަކެއް ފޮރުވުމަށް މަސައްކަތް ނުކުރާނެކަމެވެ.
ރައީސް މުއިއްޒުގެ މި ދަތުރުފުޅަކީ ވަރަށް ކާމިޔާބު ދަތުރުފުޅެއް ކަމަށް މިނިސްޓަރު ހަލީލް ފާހަގަކުރެއްވިއެވެ. އިންޑިޔާ ސަރުކާރާއެކު ކުރެވުނު މަޝްވަރާތަކުގައި ވިޝަން ޑޮކިއުމަންޓެއް އެކުލަވާލެވުނު ކަމަށާއި، މި ޑޮކިއުމަންޓަކީ ދެ ގައުމުން އެއްބަސްވެގެން ކުރެވުނު މަސައްކަތެއްގެ ނަތީޖާ ކަމަށް އޭނާ ވިދާޅުވިއެވެ. މި ޑޮކިއުމަންޓް އިންޑިޔާ ސަރުކާރާއި ރައީސް އޮފީހުގެ ވެބްސައިޓްގައި ޝާއިއު ކޮށްފައިވާ ކަމަށާއި، އޭގައި ހުރިހާ މައުލޫމާތެއް ހިމެނޭ ކަމަށްވެސް އޭނާ ވިދާޅުވިއެވެ.
މި ދަތުރުފުޅުގައި ދިވެހިރާއްޖެއާއި އިންޑިޔާއާ ދެމެދުގައިވާ ގުޅުން އިތުރަށް ބަދަހިވެގެން ދިޔަ ކަމަށް މިނިސްޓަރު ހަލީލް ވިދާޅުވިއެވެ. އަދި ކުރިމަގުގައި ދެ ގައުމުގެ ރައްޔިތުންނަށް ފައިދާވާނެ އިތުރު އެއްބާރުލުންތަކަށް އުއްމީދުކުރައްވާ ކަމަށްވެސް އޭނާ ވިދާޅުވިއެވެ. މި ދަތުރުފުޅުގައި ރައީސް މުއިއްޒު އިންޑިޔާގެ އިސް ވެރިންނާ ބައްދަލުކުރައްވައި، ދެ ގައުމުގެ ދެމެދުގައިވާ ގުޅުން އިތުރަށް ހަރުދަނާކުރުމާ ގުޅޭގޮތުން މަޝްވަރާކުރެއްވިއެވެ.
