އޭޝިއަން ޓޭބަލް ޓެނިސް ޗެމްޕިއަންޝިޕް ކުރިއަށްދަނީ ކަޒަކްސްތާންގެ އަސްތާނާގައެވެ. މި މުބާރާތުގެ ފިރިހެން ޑަބަލްސްގެ ފުރަތަމަ ބުރު ގައި މުންސިފް އާއި ޝައްފާންގެ ޕެއާވަނީ އިރާންގެ ބެންޔަމީން ފަރާޖީ އާއި ސޮހްރާބީ މުހައްމަދު ޖަވާދުގެ ޕެއާ، ފަހަތުން އަރައި، 3-2 އިން ބަލިކޮށްފަ އެވެ. މީގެ ތެރެއިން، ފަރާޖީ ވަނީ މި ފަހަރުގެ ޓީމު އިވެންޓްގައި، ދުނިޔޭގެ ރޭންކިން އެއް ވަނަ ކުޅުންތެރިޔާ، ޗައިނާގެ ވޭންގް ބަލިކޮށްފަ އެވެ.
ފިރިހެން ޑަބަލްސްގައި ދެން ކުޅުނު ރާއްޖޭގެ އަހުޔާރު އަހުމަދު އާއި ޒީކް ހަސަން ލަތީފްގެ ޕެއާ ވަނީ އިރާނުގެ އަލަމިޔާން ނޯޝާދު އާއި މުސާވީ ތަހޭދު މުހައްމަދުގެ ޕެއާ އަތުން 3-0 އިން ބަލިވެފަ އެވެ. ސެޓުތައް ދިޔައީ، 11-05، 11-05 އަދި 11-02 އިންނެވެ.
މި މުބާރާތުގެ ޓީމު އިވެންޓުން ރާއްޖޭގެ އަންހެން ޓީމަށް 20 ޓީމުގެ ތެރެއިން 16 ވަނަ ލިބުނުއިރު، ފިރިހެން ޓީމަށް ވަނީ 24 ޓީމުގެ ތެރެއިން 20 ވަނަ ލިބިފަ އެވެ.
