މި ހެލްޕްލައިނަކީ ސްކޫލް ދަރިވަރުންނާއި ޓީޗަރުންނަށް ނަފްސާނީ ފުރަތަމަ އެހީ ފޯރުކޮށްދިނުމަށް ގާއިމްކޮށްފައިވާ 1484 ނަންބަރުން ހިލޭ ގުޅޭ ހިދުމަތެކެވެ.
މި ހެލްޕްލައިން އިފްތިތާހުކޮށްދެއްވީ އެޑިއުކޭޝަން މިނިސްޓަރު ޑރ. އިސްމާއީލް ޝަފީއުއެވެ. މިނިސްޓަރު ވިދާޅުވި ގޮތުގައި މި ހިދުމަތުގެ މައިގަނޑު މަގްސަދަކީ ދަރިވަރުންނާއި ޓީޗަރުންނަށް ދިމާވާ ނަފްސާނީ ގޮންޖެހުންތަކަށް އެހީތެރިކަން ފޯރުކޮށްދިނުމެވެ. އަދި މި ހިދުމަތް މެދުވެރިކޮށް ޓީޗަރުންގެ ކަންބޮޑުވުންތަކަށް ތަސައްލީއެއް ލިބޭނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.
މި ހެލްޕްލައިންގެ ހިދުމަތް ލިބެން ހުންނާނީ ހުކުރު ދުވަސް ފިޔަވައި ކޮންމެ ދުވަހަކު ހަވީރު 3 އިން ރޭގަނޑު 9 އަށެވެ. މި ހިދުމަތް ފޯރުކޮށްދިނުމަށް ހާއްސަކޮށް ތަމްރީނު ކުރެވިފައިވާ ސްކޫލް ކައުންސެލަރުން މަސައްކަތް ކުރައްވާނެއެވެ. މި ކައުންސެލަރުން ތަމްރީނު ކުރުމުގައި ދިވެހި ރެޑް ކްރެސެންޓުން ފަންނީ އެހީތެރިކަން ފޯރުކޮށްދީފައިވާ ކަމަށް އެޑިއުކޭޝަން މިނިސްޓްރީން މައުލޫމާތު ދެއެވެ.
މި ހެލްޕްލައިން ގާއިމްކުރުމުގައި ޔުނިސެފް އަދި ވޯލްޑް ހެލްތު އޯގަނައިޒޭޝަންގެ އެހީތެރިކަން ލިބިފައިވާ ކަމަށް ވެސް އެޑިއުކޭޝަން މިނިސްޓްރީން ބުނެއެވެ. މި ހިދުމަތް ފެށުމަކީ ތައުލީމީ ދާއިރާގައި ނަފްސާނީ ދުޅަހެޔޮކަން އިތުރުކުރުމަށް އެޅޭ މުހިންމު ފިޔަވަޅެކެވެ.
