
ސޯޝަލް މީޑިއާގައި މީގަކު އާންމުކޮށްފައިވާ "ގޯލްޑެން ކަރީ" ބްރޭންޑުގެ ހަވާދުގެ ފަހަތުގައި ލިޔެފައިވާ އިންސްޓްރަކްޝަންތައް ވަނީ ޖަޕާނު ބަހުންނެވެ. ނަމަވެސް ޓްރާންސްލޭޓަރެއް ބޭނުންކޮށްގެން އެ ހަވާދުގައި ހުރި ބާވަތްތައް ބެލިއިރު، ހަވާދު އުފެއްދުމުގައި "ޕޯކް" ނުވަތަ "އޫރު މަސް" ބޭނުންކޮށްފައިވާކަމަށް ފެނެއެވެ.
"އަޅުގަނޑަކީ މުސްލިމެއްކަމުން އޫރުމަސް ކާކަށް ބޭނުމެއް ނޫން. ގޫގުލް ޓްރާންސްލޭޓަރެއް ބޭނުންކޮށްގެން އަޅުގަނޑު ބެލީ. ޖަޕާނު ބަސް އެނގޭ މީހަކު ހުރިނަމަ މިއީ ތެދެއްތޯ ބަލާލެވިދާނެތޯ؟" އޭނާ ސުވާލުކޮށްފައިވެއެވެ.
ހަވާދު ޕެކެޓުގެ ފަހަތް ޓްރާންސްލޭޓުކޮށްފައި: ފޮޓޯ ސޯޝަލް މީޑިއާ
މި ޕޯސްޓަށް ކޮމެންޓު ކުރި ޖަޕާނު މީހަކު ވެސް ބުނެފައިވަނީ ޖަޕާނު މީހުންނަނީ އެމީހުން ކާބޯތަކެތީގައި އޫރު މަސް ގިނައިން ބޭނުންކުރާ ބައެއްކަމަށެވެ. އަދި އެ ހަވާދުގައި ވެސް އޫރު މަސް އެކުލެވިގެންވާކަމަށެވެ.
ގޯލްޑަން ކަރީ ބްރޭންޑުގެ ހަވާދު
އޫރު މަހުގެ ބާވަތްތަކީ އާންމުކޮށް ދިވެހިރާއްޖެއަށް އެތެރެކޮށް ވިއްކައި ހެދުން މަނާ ބާވަތްތަކެއް ކަމަށްވާއިރު، މި ހަވާދުވެ ބާވަތް ރާއްޖެއަށް އެތެރެކުރެވުނީ ކީއްވެތޯ މި އަންނަނީ ކަމާ ގުޅުންހުރި އިދާރާތަކާއި ގުޅައިގެން ސާފުކުރަމުންނެވެ.